55:358  ad  confirmandam  fiduciam:  sed  tanquam  secundarium  (ut  ita  loquar)  adminiculum:  sed  interea  nos  in  sola  gratia  fundatos  esse  oportet.  Nec  sane  aliter  sibi  constaret  Iohannis  doctrina:  nam  experientia  demonstrat,  et  fateri  etiam  papistae  coguntur,  semper  in  operum  respectu  esse  trepidandi  materiam.  Quare  nullus  ad  Dei  tribunal  tranquillo  animo  unquam  accedet,  nisi  qui  statuet  gratuito  se  amari.  Sed  horum  nihil  gustare  papistas,  non  est  quod  quispiam  miretur,  quando  nullam  miseri  fidem  noverunt,  nisi  dubitatione  implicitam.  Adde  quod  hypocrisis  tenebras  illis  obducit  ne  serio  reputent  quam  formidabile  sit  Dei  iudicium,  ubi  non  adest  Christus  mediator.  Resurrectionem  alii  quasi  fabulosam  negligunt:  nos  autem  ut  laeti  et  alacres  obviam  Christo  prodeamus,  in  sola  eius  gratia  fidem  nostram  esse  defixam  oportet.  18.  Timor  non  est.  Iam  a  contrariis  commendat  eius  boni  praestantiam.  Nos  enim  assidue  torqueri  dicit,  donec  amoris  in  nos  sui  remedio,  a  misero  illo  cruciatu  Deus  liberet.  Summa  est,  quum  nihil  sit  miserius  quam  continua  inquietudine  vexari,  hoc  nos  consequi  agnita  Dei  erga  nos  caritate,  ut  placide  extra  metum  quiescamus.  Unde  apparet  quam  singulare  sit  Dei  beneficium,  nos  amore  suo  dignari.  Porro  ex  hac  doctrina  mox  exhortationem  ducet:  sed  priusquam  nos  ad  officium  hortetur,  donum  istud  Dei  nobis  commendat,  quod  metum  nobis  fide  eximit.  Scio  totum  hunc  locum  a  multis  secus  exponi:  sed  ego,  quid  voluerit  apostolus,  non  quid  alii  sentiant,  respicio.  Dicunt  illi  metum  non  esse  in  caritate:  quia  ubi  sponte  Deum  amamus,  non  cogimur  vi  et  metu  ad  eius  obsequium.  Ergo  secundum  eos  servilis  timor  hic  voluntariae  reverentiae  opponitur  :  unde  etiam  inter  servilem  et  filialem  timorem  nata  est  distinctio.  Ego  quidem  verum  esse  illud  fateor,  quum  liberaliter  Deum  amamus  ut  patrem,  non  cogi  nos  amplius  timore  poenae:  sed  doctrina  illa  nihil  cum  praesenti  loco  commune  habet.  Tantum  enim  docet  apostolus,  ubi  perspectus  est  nobis,  et  fide  cognitus  Dei  amor,  conscientiis  nostris  pacem  conferri,  ne  amplius  tumultuentur.  Potest  tamen  quaeri,  quando  timorem  pellat  perfecta  caritas:  quias  aliquo  tantum  divini  erga  nos  amoris  gustu  praediti,  nunquam  in  solidum  metu  liberamur.  Respondeo  tametsi  non  plane  excutitur  timor:  ubi  tamen  ad  Deum  confugimus,  tanquam  ad  tranquillum  portum,  et  ab  omni  naufragii  ac  tempestatum  periculo  tutum  et  immunem,  metum  vere  pelli,  quia  fidei  locum  cedit.  Ergo  non  ita  pellitur  timor,  quin  animos  nostros  sollicitet:  sed  ita  pellitur,  ut  non  turbet,  neque  impediat  pacem  nostram  quam  fide  obtinemus.  Timor  tormentum  habet.  Hic  quoque  apostolus  gratiae,  de  qua  loquitur  ,  magnitudinem  amplificat.  Nam  quum  miserrima  sit  conditio,  assiduos  pati  23*