52:358  habes,  spiritus  Dei  sufficiet.  Hinc  sequitur,  non  aestimandas  esse  hominum  vires  ex  Dei  praeceptis:  quia  sicuti  verbis  iubet,  ita  etiam  verba  sua  cordibus  inscribit,  ac  vires  suppeditando,  efficit  ne  frustra  iubeat.  Quod  sequitur  de  habitatione  spiritus  in  nobis,  significat  praesens  esse  eius  auxilium  fidelibus  :  modo  ne  sibi  oblatum  respuant.  15.  Nosti  hoc.  Defectiones  istae,  quas  commemorat,  poterant  multorum  concutere  animos:  et  simul  gignere  varias  suspiciones:  ut  solemus  fere  omnia  in  sinistram  partem  arripere.  Eiusmodi  offendiculis  occurrit  Paulus  cum  heroica  animi  fortitudine:  ut  boni  omnes  eorum  perfidiam  detestari  discant,  qui  servum  Christi  ita  deseruerant,  quum  solus  capitis  sui  periculo  communem  sustineret  causam:  neque  ideo  vacillent,  dum  Paulum  ipsum  intelligunt  minime  Dei  ope  destitui.  Nominat  autem  duos,  quos  credibile  est  fuisse  prae  aliis  celebres,  ut  aditum  praecludat  eorum  calumniis.  Est  enim  usitatum  transfugis  ac  militiae  christianae  desertoribus,  quo  suam  turpitudinem  excusent,  quascunque  possunt  criminationes  fingere  adversus  fideles  et  probos  evangelii  ministros.  Phygellus  et  Hermogenes,  quia  sciebant  ignaviam  suam  merito  infamem  esse  posse  apud  fideles,  adeoque  flagitiosae  perfidiae  damnari:  non  dubitassent  Paulum  gravare  falsis  rumoribus,  et  impudenter  laedere  eius  innocentiam.  Ergo  Paulus,  ut  fidem  eorum  mendaciis  deroget,  notam,  quam  merentur,  illis  inurit.  Sic  etiam  hodie  permulti,  quia  vel  non  admittuntur  hic  in  ministerium,  vel  etiam  abdicantur  honore  propter  suam  nequitiam,  vel  non  aluntur  otiosi,  vel  perpetrato  furto  aut  scortatione  aufugere  coguntur:  per  Galliam  deinde  et  alias  regiones  volitant,  ac  quascunque  possunt  criminationes  in  nos  regerendo,  suae  innocentiae  approbationem  inde  mutuantur.  Et  tanta  est  quorundam  fratrum  imperitia,  ut  nos  crudelitatis  insimulent,  si  quis  nostrum  tales  pingat  suis  coloribus.  Atqui  optandum  foret  ut  frontem  omnes  haberent  stigmate  notatam,  unde  agnoscerentur  primo  statim  congressu.  16.  Det  misericordiam  Dominus.  Ex  hac  precatione  colligimus  minime  perire  officia  sanctis  impensa,  etiamsi  gratiam  ipsi  referre  nequeant.  Nam  quod  Deum  precatur  ut  mercedem  rependat,  hoc  vim  habet  promissionis.  Et  simul  ostendit  Paulus  suam  gratitudinem,  quum  remunerandi  vices  in  Deum  transcribit,  quia  impar  est  solvendo.  Quid  si  adfuisset  remunerandi  facultas?  certe  reipsa  testatus  fuisset  hominem  se  ingratum  non  esse.  Porro  notandum  est  quod  quum  Onesiphori  solius  beneficentiam  laudet,  ob  eum  toti  familiae  bene  precatur.  Unde  colligimus,  Dei  benedictionem  non  tantum  super  caput  iusti,  sed  super  totam  domum  residere.  Tantus  est  Dei  amor  erga  suos,  ut  se  ad  omnes,  qui  cum  illis  sunt  coniuncti,  diffundat.  Quod  23*