54:356  qu'il  demande  les  livres  pour  son  usage,  et  qu'il  le  fait  estant  en  prison,  ayant  comme  despouille  ce  corps-ci,  et  se  voyant  prochain  de  la  mort,  qu'il  estoit  desia  comme  a  demi  sorti  de  ce  monde,  que  son  ame  estoit  plus  ravie  en  haut  qu'elle  n'habitoit  en  son  corps,  que  nous  voyons  qu'encores  il  ha  le  soin  d'estudier:  Helas!  que  devons-nous  faire?  Ainsi  mal-heur  sur  nostre  laschete,  quand  ceux  qui  sont  ignorans,  n'ont  point  aucun  vouloir  de  profiter  en  l'Evangile,  comme  on  le  voit.  Car  ceux  qui  sont  si  bestes  que  rien  plus,  qui  ne  scauroyent  dire  un  mot  pour  rendre  raison  de  leur  foy,  s'ils  sont  exhortez  de  s'adonner  a  lire,  et  a  ouir,  Ho,  ie  ne  suis  point  clerc  (diront-ils),  ce  n'est  pas  mon  office.  Voila  comme  les  uns  sous  ombre  de  leur  ignorance  cuident  estre  eschappez:  les  autres  si  tost  qu'ils  auront  quelque  cognoissance  de  Dieu,  et  qu'ils  pourront  disputer  de  l'Escriture  saincte,  les  voila  enflez  d'une  vaine  gloire,  tellement  qu'il  leur  semble  qu'ils  en  scavent  trop,  il  n'est  plus  question  d'estudier:  et  mesmes  cela  seroit  diminuer  de  leur  reputation,  qu'il  faut  qu'ils  facent  semblant  de  tout  scavoir:  et  principalement  s'ils  ont  quelque  estime  qu'on  les  repute  grans  docteurs,  il  faut  que  les  livres  soyent  fermez,  ils  n'ont  plus  d'usage,  ils  ne  sont  plus  de  saison  :  mais  tant  y  a  que  nous  voyons  ici  que  sainct  Paul  (duquel  nous  n'approeherons  iamais  tout  le  temps  de  nostre  vie)  estant  parvenu  a  sa  derniere  perfection,  ne  laisse  pas  encores  de  s'appliquer  a  l'estude:  et  ne  le  fait  point  par  hypocrisie,  ce  n'est  point  une  humilite  feinte,  mais  il  le  fait  scachant  que  iamais  il  ne  sera  trop  idoine  pour  enseigner  l'Eglise  de  Dieu.  Et  pourtant,  quand  nous  voudrons  estre  bons  maistres  et  bons  docteurs,  il  nous  faut  commencer  par  ce  bout,  d'estre  escoliers,  et  que  ce  ne  soit  pas  pour  le  commencement,  mais  il  nous  y  faut  employer  tout  le  temps  de  nostre  vie.  Quand  donc  sainct  Paul  nous  monstre  un  tel  exemple,  quelle  honte  sera-ce  a  nous  quand  nous  en  penserons  scavoir  assez,  quand  nous  aurons  comme  en  passant  regarde  de  loin  ce  qui  est  contenu  en  l'Escriture  saincte?  Notons  bien  donc  qu'ici  nous  sommes  exhortez  en  general  de  nous  confermer  tout  le  temps  de  nostre  vie  en  la  doctrine  de  salut.  Et  pour  ce  faire  que  nous  scachions  qu'il  ne  faut  point  que  nous  demeurions  le  bec  ouvert,  mais  que  nous  advisions  d'user  des  moyens  que  Dieu  nous  donne.  Que  nous  frequentions  les  sermons,  que  nous  ayons  la  lecture  de  la  parole  de  Dieu  pour  recommandee,  que  nous  desirions  d'estre  edifiez  par  bons  propos  et  saincts,  que  nous  ne  cessions  ne  soir  ne  matin  d'apprendre  quelque  bonne  sentence,  qui  soit  pour  nous  rafreschir  la  memoire  de  ce  que  nous  pourrions  avoir  oublie,  et  de  ce  qui  nous  pourroit  advancer  en  la  cognoissance  que  Dieu  nous  a  donnee  de  sa  verite.  Et  sur  tout  que  ceux  qui  ont  la