49:355  355  EPIST.  PAULI  AD  CORINTHIOS  I  356  12.  Si  quis  autem  superstructi  super  fundamentum  hoc.  Perseverat  in  metaphora.  Non  satis  fuerit,  iactum  esse  fundamentum,  nisi  tota  superficies  respondeat.  Nam  ut  aureo  fundamento  vilem  materiam  superiicere  absurdum  esset:  ita  Christum  superiectis  alienis  doctrinis  obrui  nefas  est.  Aurum  ergo,  et  argentum,  et  gemmas  vocat  doctrinam  Christo  dignam,  et  quae  sit  congrua  tali  fundamento  superficies.  Porro  ne  imaginemur  hanc  doctrinam  extra  Christum  esse,  sed  potius  intelligamus,  pergendum  esse  in  Christo  docendo  usque  ad  aedificii  complementum.  Ordo  tantum  servandus  est,  ut  a  generali  doctrina  et  capitibus  magis  necessariis,  tanquam  a  fundamentis,  initium  fiat:  deinde  succedant  admonitiones,  exhortationes,  et  quidquid  ad  perseverantiam,  confirmationem,  profectum  requiritur.  Quum  hactenus  extra  controversiam  de  Pauli  sensu  conveniat:  sequitur  e  converso  per  lignum,  et  stipulam,  et  foenum  designari  doctrinam  fundamento  non  conformem  :  qualis  est,  quae  in  hominum  cerebro  fabrefacta  pro  Dei  oraculis  obtruditur.  Pura  enim  verbi  sui  praedicatione  ecclesiam  suam  institui  vult  Deus,  non  hominum  figmentis:  qualis  est  etiam  quae  nihil  ad  aedificationem  facit,  ut  sunt  curiosae  quaestiones,  quae  ostentationi  magis  vel  stultae  cupiditati,  ut  plurimum,  quam  hominum  saluti  serviunt.  Quale  s  i  t  cuiusque  opus,  etiam  si  ad  tempus  lateat,  palam  fore  aliquando  denuntiat:  quasi  diceret:  fieri  quidem  potest  ut  fallant  ad  tempus  mali  operarii,  ut  minime  discernat  mundus  quam  fideliter  aut  fraudulenter  quisque  laboraverit:  sed  necesse  est  tandem  exstare  quod  nunc  est  velut  tenebris  sepultum  :  et  quod  nunc  coram  hominibus  gloriosum,  coram  facie  Dei  concidere  et  pro  nihilo  haberi.  13.  Dies  enim  manifestabit.  Vetus  translatio  habet  diem  Domini:  sed  credibile  est,  genitivum  illum  fuisse  ab  alio  quopiam  additum  explicationis  causa.  Certe  sensus  sine  ista  adiectione  plenus  est.  Dies  enim  apte  vocatur  tempus  illud,  quo  discussis  tenebris  et  caligine  illustratur  veritas.  Ergo  denuntiat  apostolus,  non  semper  latere  posse  qui  fraudulenter  egerint  in  opere  Domini,  aut  qui  se  fidos  gesserint:  ac  si  diceret,  non  semper  erunt  tenebrae,  aliquando  lux  orietur,  quae  omnia  manifestabit.  Hunc  diem  fateor  Dei  esse,  non  hominum.  Sed  plus  gratiae  habet  metaphora,  si  diem  simpliciter  legas:  quia  subindicat  Paulus  hoc  modo,  non  semper  bene  discerni  veros  Domini  servos  a  falsis  operariis,  quia  noctis  obscuritate  vitia  et  virtutes  tegantur:  sed  noctem  hanc  non  fore  perpetuam.  Caeca  enim  est  ambitio,  caecus  hominum  favor,  caecus  mundi  applausus:  sed  has  tenebras  suo  tempore  Deus  postea  discutit.  Observa  ut  bonae  conscientiae  fiduciam  semper  ostendat,  et  invicta  animi  altitudine  despiciat  perversa  iudicia: