52:354  fructum  huius  gratiae  pervenire  ad  homines  quam  per  evangelium.  Iuxta  illud  (2.  Cor.  5,  19):  Erat  Deus  in  Christo  mundum  sibi  reconcilians:  et  deposuit  apud  nos  sermonem  reconciliationis.  Atque  hoc  insigne  est  ac  memorabile  evangelii  encomium,  quod  vocatur  vitae  illustratio.  Vitae  subiicit  immortalitatem:  ac  si  diceret  veram  et  immortalem  vitam.  Nisi  forte  per  vitam  intelligere  malis  regenerationem,  quam  sequitur  beata  immortalitas  quae  adhuc  speratur.  Et  certe  hoc  nostrum  vivere  est,  non  quod  habemus  cum  brutis  animalibus  commune,  sed  quod  participatione  imaginis  Dei  constat.  Quia  autem  in  hoc  mundo  non  apparet  quid  sit,  aut  quid  valeat  talis  vita:  merito  exprimendi  causa  immortalitatem  addidit,  quae  est  eius  vitae,  quae  nunc  abscondita  est,  revelatio.  l  l  .  In  quod  positus.  Non  frustra  tantopere  evangelium  una  cum  apostolatu  suo  commendat.  Nihil  enim  usque  adeo  molitur  Satan,  quam  ut  sanae  doctrinae  fidem  quoquo  modo  ex  animis  nostris  exterminet:  quia  vero  hoc  non  semper  illi  promptum  est,  si  nos  invadat  aperto  marte:  clandestinis  et  obliquis  artibus  nos  adoritur.  Nam  ut  fidem  abroget  doctrinae,  piorum  doctorum  vocationem  labefactat.  Paulus  ergo  quum  mortem  haberet  prae  oculis,  non  ignorans  veteres  et  usitatas  Satanae  insidias,  tam  evangelii  doctrinam  in  genere,  quam  vocationem  suam  asserere  voluit:  sicuti  utrumque  erat  necessarium.  Nam  ut  longae  conciones  habeantur  de  evangelii  dignitate,  non  multum  nobis  proderunt,  nisi  teneamus  quale  sit  evangelium.  Multi  enim  consentient  in  istud  universale  principium  de  certa  evangelii  autoritate,  qui  postea  tamen  nihil  habebunt  certi  quod  sequantur.  Haec  ratio  est  cur  nominatim  velit  se  agnosci  Paulus  fidum  et  legitimum  ministrum  vivificae  illius  doctrinae  cuius  meminerat.  Atque  huc  pertinet  quod  variis  titulis  se  ornat  in  re  una  exprimenda.  Praeconem  se  vocat,  cuius  partes  sunt,  principum  et  magistratuum  decreta  publicare.  Apostoli  nomen  proprium  est.  Porro  quia  inter  doctorem  et  discipulos  est  relatio,  hoc  quoque  tertium  nomen  sibi  adscribit,  ut  sciant  qui  ab  eo  discunt,  habere  se  magistrum  divinitus  sibi  ordinatum.  Quibus  autem  se  positum  esse  testatur?  gentibus.  Nam  de  illis  praecipua  erat  controversia:  quod  Iudaei  negabant  vitae  promissiones  ad  alios,  nisi  ad  carnales  Abrahae  filios,  pertinere.  Ergo  ne  dubia  sit  gentium  salus,  affirmat  se  ad  eas  peculiariter  a  Deo  fuisse  missum.  12.  Quam  etiam  ob  causam  haec  patior.  Satis  notum  est,  hinc  magis  quam  ulla  alia  de  causa  fuisse  accensam  Iudaeorum  rabiem  adversus  Paulum,  quod  evangelium  gentibus  commune  faceret.  Quamquam  particula,  ob  quam  causam,  refert  totum  complexum:  ideoque  ad  hoc  postremum  membrum  de  gentibus  restringi  non  debet.  Ergo  ne  vincula  23