32:354  laceri  corporis,  non  censebimur  unum.  Itaque  sicut  in  Deo  patre  et  Christo  unum  sumus,  ita  mutuo  consensu  et  fraterno  amore  sancienda  inter  nos  unitas.  Si  quando  dederit  Dominus,  ut  papistae  ex  defectione  ad  piam  concordiam  redeant,  his  verbis  licebit  gratias  Deo  agere:  interea  quicunque  se  Deo  placide  submittunt,  eos  amplecti  decet.  Quia  vero  assidue  turbulentos  spiritus  excitat  Satan,  contra  nitamur,  et  sedulo  retineamus  quicunque  se  praestabunt  dociles  ac  morigeros.  Caeterum  praefractos  omittere  necesse  est,  quibuscum  fraterna  coniunctio  coli  non  potest  quin  summum  patrem  abnegemus,  a  quo  oritur  omnis  cognatio.  Pax  enim  quam  commendat  David,  a  legitimo  capite  incipere  debet,  quo  satis  refellitur  papistarum  improbitas,  qui  nobis  schismata  et  dissensiones  odiose  exprobrant,  ac  si  non  satis  a  parte  nostra  testatum  foret,  non  aliud  nos  quaerere  nisi  ut  nobiscum  in  Dei  veritatem  consentiant,  quae  unicum  est  sanctae  unitatis  vinculum.  2.  (Sicut  oleum  pretiosum  super  caput.)  Aperte  confirmat  David  quod  nuper  docui,  veram  scilicet  fratrum  coniunctionem  initium  habere  a  Deo,  legitimumque  eius  finem  esse  ut  pure  Deum  omnes  colant,  unoque  consensu  invocent.  Quorsum  enim  similitudinem  mutuatur  a  sacro  unguento,  nisi  ut  religio  primum  semper  gradum  teneat?  ac  si  diceret,  insipidam  fore  pacem  quam  inter  se  colent  homines,  nisi  cultus  Dei  odore  perfusa  sit.  Nunc  ergo  tenemus,  sic  inter  se  coniungi  homines  mutuo  amore,  ut  Dens  omnes  simul  gubernet.  Quibus  vero  haec  conditio  non  placebit,  cum  illis  praestabit  acriter  dimicare,  quam  pacem  redimere  Dei  contemptu.  Hoc  enim  tenere  convenit,  in  sacerdotis  persona  ostendi  concordiam  fluere  a  vero  et  puro  Dei  cultu,  deinde  per  barbam  et  extremas  partes  vestium  notari,  quam  longe  lateque  patet  ecclesia,  pacem  quae  a  capite  Christo  manat,  diffundi.  Altera  similitudo  sumpta  a  rore,  qui  tam  in  montem  Hermon  quam  super  Sion  distillat,  ostendit  piam  concordiam  non  modo  suavis  esse  odoris  coram  Deo,  sed  proferre  etiam  utiles  fructus:  sicuti  ros  terram  irrigando  succum  et  vigorem  suppeditat.  Scimus  autem  quid  de  Iudaea  dicat  Moses,  non  esse  similem  Aegypto  quam  fluvii  exundatio  foecundat,  sed  pluviam  quotidie  e  coelo  exspectare.  Monuit  ergo  David,  ieiunam  ac  sterilem,  miseram  denique  fore  hominum  vitam,  nisi  fraterno  consensu  foveatur.  Montem  vero  Hermon  pinguem  et  opimum  fuisse  constat,  quia  celebratur  inter  loca  pascua.  Praecipua  vero  montium  ubertas  ex  rore  coelesti:  quod  in  monte  Sion  satis  conspicuum  erat.  Postremo  subiicit  David  Deum  benedictionem  mandare  ubi  pax  colitur,  hoc  est,  laeta  bonorum  abundantia  testari  quantopere  sibi  placeat,  homines  vivere  unanimes.  Hanc  sententiam  aliis  verbis  imitatum  est  Paulus  23