54:352  ayons  conduit  les  autres  tellement  que  nous  puissions  estre  mis  comme  au  premier  rang,  advisons  de  cheminer  tousiours  en  solicitude,  et  ne  pensons  point  que  Dieu  nous  ait  prins  a  loage  seulement  pour  quelque  temps,  et  qu'il  nous  donne  conge  au  bout  du  terme,  mais  scachons  qu'il  n'y  a  qu'une  seule  condition  et  simple  en  servant  a  Dieu,  c'est  ascavoir  que  nous  luy  dedions  nostre  vie  et  nostre  mort.  Que  tous  ceux  qui  ont  fidelement  travaille  en  edifiant  l'Eglise  de  Dieu,  en  advancant  l'Evangile  de  nostre  Seigneur  Iesus  Christ,  se  mirent  en  la  personne  de  Demas,  auquel  il  est  reproche  qu'il  a  mieux  aime  le  monde  :  et  qu'ils  cognoissent  finalement  que  s'ils  ne  perseverent,  encores  que  tous  les  hommes  du  monde  leur  pardonnassent  une  telle  faute,  qu'il  faudra  qu'elle  viene  en  conte  devant  Dieu.  Car  nous  serons  iugez  en  une  mesme  mesure  devant  celuy  qui  n'accepte  point  les  personnes,  mais  qui  prononce  en  verite.  Cognoissons  donc,  encores  que  le  monde  nous  favorisast,  et  qu'un  tel  vice  ne  fust  point  apperceu  en  nous,  ou  qu'il  ne  fust  point  cognu,  que  nous  n'y  aurons  rien  gagne,  pource  qu'en  la  fin  ii  nous  faudra  passer  par  ceste  condamnation  de  Demas,  si  nous  ne  persistons  iusques  au  bout  a  cheminer  selon  que  Dieu  nous  appelle,  et  pour  retrancher  toutes  les  cupiditez  que  Satan  nous  presente  pour  nous  faire  aimer  le  monde.  Il  est  vray  que  nous  pourrons  bien  avoir  soin  de  nostre  vie,  et  procurer  les  choses  qui  nous  y  sont  necessaires:  mais  c'est  avec  tel  si,  que  nous  ne  soyons  point  cependant  reculez,  ni  destournez  de  nostre  vocation.  Il  faut  qu'un  chacun  regarde  a,  quoy  Dieu  l'ordonne,  et  qu'il  ait  sa  charge.  Si  nostre  Seigneur  nous  donne  repos,  et  que  nous  luy  puissions  servir  sans  grans  combats,  remercions-le  de  ce  qu'il  supporte  nostre  foiblesse:  et  cependant  toutesfois  gardons-nous  bien  de  nous  endormir  en  nos  aises  et  delices,  que  nous  ne  laissions  point  de  marcher  plus  outre,  encores  que  nous  ne  soyons  point  pressez  d'afflictions,  et  que  Dieu  voyant  nostre  foiblesse,  ne  vueille  point  lascher  la  bride  a  Satan,  et  luy  permettre  de  nous  persecuter  iusques  ^au  bout.  Mais  cependant  si  Dieu  veut  que  nous  soyons  affligez,  que  nous  ne  facions  point  tout  ce  que  nous  desirerions,  que  nous  ne  prenions  point  d'excuse  pour  dire,  Ie  ne  voudroye  point  renoncer  iamais  a  ce  que  i'ay  cognu  de  l'Evangile,  ie  ne  voudroye  point  me  retirer  de  mon  devoir:  mais  quoy?  il  y  a  tant  de  difficultez  que  rien  plus:  et  il  me  semble  que  ie  ne  laisseray  point  de  servir  a  Dieu,  et  d'avoir  mes  commoditez.  Voire,  mais  voici  Dieu  qui  nous  appelle  d'un  coste,  et  nous  tirons  tout  au  rebours,  et  nous  semble  qu'il  nous  sera  licite  de  tourner  bride,  et  de  laisser  le  train  lequel  il  nous  aura  monstre*  Ainsi  donc  qu'un  chacun  regarde  de  pres  a  soy,  et  que  nous  cognoissions  que  veut  dire  ceste