5:352  (Ioann.  20,  23).  Ligare  autem,  alibi  peccata  retinere:  solvere,  remittere,  Christus  ipse  interpretatur.  Iam  quae  sit  solvendi  ratio,  exponit  apostolus  (Rom.  1,  16),  dum  evangelium  virtutem  Dei  esse  docet,  ad  salutem  omni  credenti.  Rursum  quis  ligandi  modus,  dum  promptam  penes  apostolos  vindictam  esse  dicit  adversus  omnem  inobedientiam  (2  Cor.  10,  S).  Siquidem  evangelii  summa  est,  nos  peccati  mortisque  servos,  solvi  ac  liberari  per  redemptionem  quae  est  in  Christo  Iesu,  quem  qui  redemptorem  non  suscipiunt,  eos  novis  gravioris  damnationis  vinculis  constringi.  Verum  meminerimus  illam,  quae  pastoribus  in  scriptura  defertur,  potestatem,  totam  verbi  ministerio  terminatam  esse.  Non  enim  hanc  potestatem  hominibus  proprie  Christus  dedit:  sed  verbo  suo,  cuius  homines  ministros  fecit.  Itaque  verbo1)  Dei,  cuius  positi  sunt  dispensatores,  confidenter  omnia  audeant,  eius  maiestati  omnem  mundi  virtutem,  gloriam,  sublimitatem  cadere2)  atque  obedire  cogant-  per  ipsum  omnibus,  a  summo  usque  ad  novissimum,  imperent,  Christi  domum  aedificent,  Satanae  regnum  subvertant,  oves  pascant,  lupos  interficiant,  dociles  instituant  et  exhortentur,  rebelles  et  pervicaces  arguant,  increpent,  revincant:  sed  omnia  in  verbo.  A  quo  si  ad  sua  somnia,  capitisque  sui  figmenta  divertant,  [pag.  48]  iam  non  pro  pastoribus  habendi:  sed,  quum  lupi  sint  potius  pestilentes,  abigendi  sunt.  Non  enim  alios  audiri  Christus  praecipit,  quam  qui  nos  doceant,  quae  ab  eius  verbo  sumpserint.  DE  TRADITIONIBUS  HUMANIS.  Quum  generalem  Pauli  sententiam  habeamus,  ut  decenter  et  ordine  fiant  in  ecclesiis  omnia  (1  Cor.  14,  40),  civiles  observationes,  quibus  ceu  vinculis,  ordo  et  decorum  in  Christianorum  coetu  consistat,  vel  concordia  retineatur,  nequaquam  inter  humanas  traditiones  numerandae  sunt:  sed  ad  illam  apostoli  regulam  potius  referendae,  modo  ne  vel  ad  salutem  necessariae  credantur,  vel  conscientias  religione  obstringant,  vel  ad  Dei  cultum  conferantur,  vel  in  illis  pietas  reponatur.  Quae  vero  sub  titulo  spiritualium  legum,  ad  ligandas  conscientias,  velut  ad  Dei  cultum  necessariae  feruntur,  iis  fortiter  est  resistendum.  Non  enim  libertatem  solum,  quam  nobis  Christus  acquisivit,  evertunt:  sed  veram  quoque  religionem  obscurant,  ac  Dei  maiestatem  violant,  qui  solus  in  conscientiis  nostris  regnare  vult  per  verbum  suum.  Fixum  ergo  istud  maneat,  Omnia  nostra  esse,  nos  autem  Christi  (1  Cor.  3,  23):  frustra  vero  coli  Deum,  ubi  docentur  doctrinae,  hominum  praecepta  (Matth.  15,  9).  1)  Instit,  p.  427  seq.  2)  Sic  legitur  m  Catechismo,  Institutio  exhibet  caedere,  i.  e.  cedere.