49:352  quam  nihili  sit  inanis  ille  favor,  verborum  elegantia  et  vana  ostentatione  elicitus:  simul  his  verbis  conscientiae  securitatem  prae  se  fert,  quod  audet  iudicium  Dei  intrepidus  exspectare.  Nam  quod  ambitiosi  homines  se  mundo  venditant,  id  fit  quia  non  didicerunt  se  Deo  addicere,  nec  coeleste  Christi  regnum  ante  oculos  illis  versatur.  Simul  ergo  atque  Deus  in  medium  prodit,  evanescit  stulta  illa  captandi  humani  favoris  cupiditas.  9.  Dei  enim  cooperarii.  Optima  ratio:  Domini  negotium  est  quod  agimus,  et  is  est,  cui  locavimus  nostram  operam:  ergo  ut  est  fidelis  et  aequus,  non  frustrabitur  nos  mercede:  quare  fallitur  qui  ad  homines  respectas  aut  ab  eorum  remuneratione  pendet.  Eximium  elogium  ministerii,  quod  quum  per  se  agere  possit  Deus,  nos  homunciones  tanquam  adiutores  adsciscat  et  tanquam  organis  utatur.  Quod  vero  papistae  ad  stabiliendum  liberum  arbitrium  hoc  testimonio  abutuntur,  nimis  frivolum  est:  neque  enim  quid  valeant  homines  viribus  naturae  hic  docet  Paulus,  sed  quid  per  eos  Dominus  gratia  sua  agat.  Quod  exponunt  quidam,  Paulum,  qui  operarius  erat  Dei,  collegis  suis,  hoc  est,  reliquis  doctoribus  fuisse  cooperarium,  mihi  durum  et  coactum  videtur:  nec  vero  ulla  ratio  cogit  ad  hanc  argutiam  confugere.  Nam  apostoli  proposito  optime  convenit,  quum  proprium  Dei  munus  sit  templum  suum  aedificare  aut  vineam  excolere,  eum  ministros  adsciscere  in  societatem  laboris,  per  quos  ita  solus  ipse  agit,  ut  tamen  in  commune  cum  eo  vicissim  laborent.  De  operum  mercede,  lege  Institutionem  meam.  Dei  agricultura,  Dei  aedificatio.  Possunt  haec  duobus  modis  exponi:  active,  hoc  sensu:  Sic  hominum  labore  plantati  estis  in  agro  Domini,  ut  ipse  coelestis  pater  verus  sit  agricola,  autor  huius  plantationis:  sic  aedificati  estis  per  homines,  ut  ipse  sit  verus  architectus.  Passive  autem,  hoc  sensu:  Quod  in  vobis  excolendis,  quod  in  verbo  Dei  inter  vos  seminando  et  irrigando  laboravimus,  id  non  fecimus  nostra  causa,  neque  ut  fructus  ad  nos  perveniret,  sed  Domino  impendimus  nostrum  obsequium:  quod  aedificare  vos  studuimus,  ad  id  proprii  commodi  respectu  non  fuimus  impulsi,  sed  ut  Dei  plantatio  et  aedificium  essetis.  Mihi  haec  posterior  interpretatio  magis  probatur.  Sentio  enim  Paulum  voluisse  hic  exprimere,  veros  ministros  non  laborare  sibi,  sed  Domino.  Hinc  sequitur,  perperam  facere  Corinthios  qui  hominibus  se  addicant,  quum  iure  solius  sint  Dei.  Ac  primo  quidem  eos  agricolationem  vocat,  in  metaphora  iam  coepta  perseverans:  deinde  ut  transitum  sibi  ad  plura  faciat,  alteram  metaphoram  assumit  ab  architectura.  10.  Ut  sapiens  architectus,  secundum  gratiam  Dei  mihi  datam  fundamentum  posui,  alius  autem  superaedificat:  porro  unusquisque  videat  quomodo  aedir