47:350  mundi  nomine  omnes,  qui  spiritu  Dei  regeniti  non  sunt,  hoc  loco  Christus  designat.  Nam  ecclesiam  mundo  opponit,  ut  plenius  videbimus  capite  decimo  septimo.  Neque  tamen  cum  hac  doctrina  pugnat  illa  Pauli  exhortatio:  Pacem  habete  cum  omnibus,  quantum  in  vobis  est  (Rom.  12,  18).  Nam  quae  additur  exceptio  tantundem  valet  ac  si  diceret,  videndum  esse  quid  nobis  liceat  et  fas  sit,  ne  quis  studio  placendi  mundi  corruptelis  indulgeat.  Verum  potest  adhuc  alia  obiici  quaestio.  Nam  sceleratos,  qui  ex  mundo  sunt,  vulgo  non  odio  tantum  haberi  cernimus,  sed  exsecrationi  esse.  Hic  certe  mundus  non  diligit  quod  suum  est.  Respondeo,  terrenis  hominibus,  qui  aguntur  pro  sensu  carnis  suae,  nunquam  vere  odio  esse  peccatum,  sed  tantum  quatenus  proprii  commodi  vel  damni  cura  eos  afficit.  Quanquam  Christi  consilium  non  fuit  negare,  quin  mundus  intestinis  discordiis  ferveat  et  intra  se  tumultuetur,  tantum  ostendere  voluit,  mundum  nonnisi  quod  Dei  est  in  fidelibus  odio  habere.  Atque  hinc  quoque  liquet,  quam  stulte  delirent  Anabaptistae  qui  hoc  uno  argumento  colligunt,  se  Dei  esse  servos,  quia  maiori  hominum  parti  displiceant.  Prompta  est  enim  exceptio,  quod  multi  qui  ex  mundo  sunt,  quos  scilicet  delectat  foeda  rerum  omnium  confusio,  eorum  doctrinae  faveant:  multi  item  ex  mundo  eam  oderint,  quia  politicum  ordinem  cupiunt  manere  salvum.  20.  Mementote  sermcnis.  Posset  etiam  indicativo  modo  legi,  Memores  estis:  sed  sensu  non  admodum  diverso.  Imperativus  tamen  modus  meo  iudicio  melius  congruit.  Est  autem  confirmatio  proximae  sententiae,  ubi  dicebat  Christus  se  mundo  exosum  fuisse,  qui  tamen  discipulis  erat  praestantior.  Neque  enim  aequum  est  ut  potior  sit  servi  conditio  quam  domini.  Porro  ubi  de  personis  loquutus  est,  mentionem  etiam  doctrinae  facit.  Nihil  enim  pios  magis  conturbat  quam  dum  doctrinam,  quae  Dei  est,  superbe  ab  hominibus  contemni  viderit.  Est  enim  portentum  horribile,  cuius  adspectus  fortissimum  quodque  pectus  labefactare  posset.  Sed  dum  ex  alia  parte  succurrit,  ipsum  Dei  filium  non  minus  contumaciae  expertum  esse,  non  est.quod  miremur,  doctrinam  Dei  tam  parum  habere  inter  homines  reverentiae.  Quod  suam  et  illorum  doctrinam  dicit  ad  ministerium  refertur.  Unicus  est  ecclesiae  magister  Christus,  sed  doctrinam  suam,  cuius  magister  primus  fuerat,  voluit  deinde  per  apostolos  suos  praedicari.  21.  Sed  haec  omnia.  Quia  prodigiosus  est  mundi  furor,  dum  ita  in  salutis  suae  doctrinam  insanit,  causam  affert  Christus,  quod  caeca  ignorantia  feratur  in  suam  perniciem.  Nemo  enim  ex  professo  contra  Deum  in  bellum  insurgeret.  Caecitas  ergo  est  ac  ignoratio  Dei  quae  mundum  rapit,  ut  bellum  inferre  Christo  non  dubitet.  Semper  ergo  habenda