48:35  35  IN  ACTA  APOSTOLORUM  36  TIcae  sunt  loquutiones,  quibus  significat,  Dominum  signa  per  totam  orbis  machinam  daturum  irae  suae  quae  homines  terrore  exaniment,  ac  si  horrenda  fieret  totius  naturae  conversio.  Sicuti  enim  sol  et  luna  paterni  erga  nos  favoris  Dei  testes  sunt,  dum  lucem  vicibus  suis  terrae  ministrant:  ita  ex  adverso  dicit  propheta,  irati  et  offensi  Dei  fore  nuntios.  Atque  hoc  secundum  est  membrum  prophetiae.  Postquam  enim  de  spiritualis  gratiae  affluentia  disseruit  super  omnem  carnem:  ne  quis  omnia  simul  prospera  et  tranquilla  imaginaretur,  subiicit  turbulentum  multoque  horrore  plenum  fore  statum  mundi  sub  Christo.  Quemadmodum  et  Christus  ipse  plenius  admonet  Matthaei  24  et  Lucae  vicesimo  primo.  Sed  hoc  ad  gratiae  commendationem  plurimum  valet,  quod  ubi  omnia  minantur  exitium,  quisquis  tamen  nomen  Dei  invocat  salutis  suae  securus  est.  Per  caliginem  solis,  per  sanguinolentum  lunae  defluxum,  per  atrum  vaporem  fumi  exprimere  voluit  propheta,  quocunque  homines  vertant  oculos,  ubique  sursum  et  deorsum  multa  apparitura  quae  terrorem  incutiant:  quemadmodum  iam  attigi.  Perinde  ergo  hoc  valet  ac  si  dixisset,  nunquam  tam  misere  habuisse  res  in  mundo,  nunquam  tot  et  tam  atrocia  irae  Dei  signa  exstitisse.  Hinc  colligitur,  quam  inaestimabilis  sit  Dei  bonitas,  qui  praesens  remedium  tantis  malis  offert:  et  rursus  quam  ingrati  sint  Deo  ac  perversi  qui  ad  propinquum  et  obvium  salutis  asylum  non  confugiunt.  Neque  enim  dubium  est,  quin  hac  tam  tristi  descriptione  pios  omnes  excitare  Deus  velit,  ut  ardentiore  desiderio  salutem  expetant.  Et  Petrus  in  eundem  finem  citat:  ut  sciant  Iudaei  se  plus  quam  calamitosos  fore,  nisi  oblatam  sibi  spiritus  gratiam  suscipiant.  Quaeritur  tamen,  qui  conveniat,  Christo  manifestato,  tantum  simul  mare  malorum  exundare.  Absurdum  enim  videri  potest,  ipsum  divini  erga  genus  humanum  amoris  unicum  esse  pignus,  in  quo  coelestis  pater  omnes  bonitatis  suae  thesauros  explicat:  imo  viscera  misericordiae  suae  in  nos  effundit,  et  tamen  eiusdem  adventu  iram  Dei  solito  violentius  ardere,  ut  coelum  et  terram  uno  quasi  incendio  corripiat.  Sed  primo  observandum  est  quia  nimium  pigri  sunt  homines  ad  recipiendum  Christum,  variis  afflictionibus  quasi  flagellis  urgendos  esse.  Deinde,  quum  laborantes  et  malis  gravatos  ad  se  Christus  vocet,  multis  prius  malis  domari  nos  necesse  est,  ut  humilitatem  discamus.  Nam  ex  secundo  rerum  suarum  statu  cornua  superbiae  induunt  homines.  Nec  fieri  aliter  potest,  quin  ferociter  Christum  contemnat,  qui  sibi  felix  videtur.  Tertio,  quia  plus  aequo  propensi  sumus  ad  quaerendam  carnis  pacem:  unde  etiam  fit,  ut  Christi  gratiam  multi  alligent  praesenti  vitae:  ad  diversam  cogitationem  nos  assuefieri  expedit,  ut  sciamus  spirituale  esse  Christi  regnum.  Ergo  Deus  ut  coelestia  Christi  bona  esse  doceat,  multis  aerum-