23:35  35  COMMENTARIUS  IN  GENESIN.  36  Deus  terram,  non  more  iam  usitato:  (quia  nullum  erat  semen,  nulla  radix,  nulla  planta  quae  germinarent)  sed  Dei  iussu  et  verbi  eius  virtute  repente  exstiterunt.  Duravit  in  illis  vigor  ut  in  sua  natura  starent,  non  ista  vegetatione  quae  cernitur,  non  pluviae  beneficio,  non  humana  irrigatione  vel  cultura:  sed  quia  vapore  Deus  terram  irrigabat.  Duo  enim  excludit,  pluviam,  unde  succum  trahit  terra  ut  nativum  suum  humorem  retineat:  et  hominum  culturam,  quae  naturae  est  adminiculum.  Quum  dicit,  nondum  pluisse  Deum,  simul  indicat  eum  esse  qui  aperit  cataractas  coeli  et  claudit,  pluviamque  et  siccitatem  esse  in  eius  manu.  7.  Formaverat  autem  Deus  hominem.  Quod  prius  omiserat  in  creatione  hominis,  nunc  exponit,  sumptum  e  terra  fuisse  eius  corpus.  Dixerat  formatum  ad  imaginem  Dei.  Haec  summa  et  incomparabilis  nobilitas:  cuius  praetextu  ne  superbiant  homines,  prima  illis  sua  origo  in  medium  proponitur,  unde  agnoscant  adventitium  illud  fuisse  bonum.  Refert  enim  Moses  hominem  fuisse  principio  terrae  pulverem.  Eant  nunc  stulti  homines,  et  de  naturae  suae  excellentia  glorientur.  De  reliquis  animalibus  dictum  fuerat:  Producat  terra  omnem  animam  viventem:  nunc  luteum  et  sensu  carens  fingitur  Adae  corpus:  ne  quis  sibi  ultra  modum  in  carne  sua  placeat,  plusquam  enim  stupidus  est  quisquis  humilitatem  inde  non  discit.  Quod  aliunde  postea  accessit,  Deo  nos  tantundem  obligat.  Quanquam  simul  aliqua  praestanti  nota  discernere  hominem  voluit  a  brutis  animalibus:  haec  enim  momento  e  terra  exstiterunt.  At  quod  homo  paulatim  formatus  est,  peculiaris  in  hoc  ostensa  est  eius  dignitas.  Cur  enim  Deus  non  statim  vivum  e  terra  iubet  exire,  nisi  ut  privilegio  quodam,  prae  omnibus  quae  terra  produxit,  emineat?  Inspiraverat  in  faciem.  Quidquid  sentiant  plerique  veterum,  subscribere  eorum  sententiae  non  dubito  qui  de  animali  hominis  vita  locum  hunc  exponunt:  atque  ita  flatum  interpretor,  quem  spiritum  vitalem  nominant.  Si  quis  obiiciat,  non  debuisse  igitur  discrimen  poni  inter  hominem  et  caetera  animantia,  quum  hic  nihil  referat  Moses  nisi  quod  omnibus  simul  commune  est:  respondeo,  quamvis  hic  tantum  memoretur  inferior  animae  facultas,  quae  corpus  inspirat,  et  illi  dat  vigorem  et  motum:  non  tamen  obstare  quin  gradum  suum  obtineat  anima,  ideoque  seorsum  poni  debuerit.  De  flatu  primum  loquitur  Moses:  deinde  subiicit,  datam  esse  animam  homini  qua  viveret,  sensuque  et  motu  esset  praeditus.  Iam  virtutes  humanae  animae  scimus  plures  esse  ac  varias.  Quare  nihil  absurdi  si  nunc  unam  tantum  attingat  Moses:  partem  vero  intellectualem  omittat,  cuius  mentio  primo  capite  facta  est.  Ac  tres  gradus  in  hominis  creatione  notandi