6:349  DE  LIBERO  ARBITRIO.  Domino  non  paruimus,  eo  factum  est,  quia  peccati  dominationi  obnoxiis  liberum  non  fuit.  Frustra  igitur  mala  nobis  exprobrantur,  quae  effugere  non  fuit  nostrae  potestatis.  Respondeo  quod  verum  est  ac  simplex:  investigandum  esse  mali  fontem,  ut  inde  iudicetur,  ubinam  resideat  culpa,  aut  in  quem  conferri  debeat.  Iam  nemo  aliud  causari  potest  cur  peccet,  nisi  malam  voluntatem.  Voluntatis  porro  malitia  non  aliunde  est,  quam  ex  haereditaria  corruptione.  Quid  igitur  prodest,  eius  invidiam  alio  derivare,  quod  iure  nobis  imputatur?  Culpae  radicem  in  nobis  invenimus.  Quid  ergo,  ad  captandam  excusationem  conamur  alio  transferre?  Hanc  responsionem  satis  valida  confutatione  repellere  se  putat  Pighius,  dum  suo  fastidio  respuit:  nisi  quod  in  Moysis  testimonio,  illic  etiam  excusso,  aliquanto  diligentius  insistit.  Moyses  enim,  promulgata  [pag.  162]  lege,  populum  in  hunc  modum  contestatur:  Mandatum  hoc,  quod  ego  hodie  tibi  praecipio,  non  est  occultum,  neque  procul  positum,  sed  iuxta  te  est,  in  ore  tuo,  et  in  corde  tuo  (Deut.  30,  11.  14).  Haec  contestatio  quum  videatur  in  homine  multum  collocare,  videri  etiam  posset  superiori  solutioni  esse  contraria.  Eam  igitur  adduco  et  explico:  neque  tamen  interim  dissimulo,  eludere  promptum  mihi  fore,  si  cavillari  haberem  in  animo:  utique  si  de  notitiae  tantum,  non  autem  observandi  facilitate,  agi  dixero.  Sed  ostendo  ex  Paulo,  quis  sine  dubio  genuinus  sit  ac  purus  sensus:  nempe  si  ad  evangelium,  non  ad  legem  referas.  In  refellenda  priori  solutione,  quam  ipse  cavillatoriam  esse  fateor,  multum  laborat  Pighius:  ad  hanc  alteram  quum  ventum  est,  nihil  posse  absurdius  fingi  existimat,  aut  magis  a  Moysis  verbis  dissentaneum,  quam  si  verum  sit,  de  evangelio  oportere  hoc  intelligi.  Iam  nihil  miror,  quod  tam  saevum  ac  truculentum  adversum  nos  se  praebeat,  quum  in  spiritum  sanctum  nihilo  sit  clementior.  Certe  spiritus  Christi,  qui  per  Moysen  loquutus  fuerat,  per  os  Pauli  (Rom.  10,  5.  8),  quid  voluerit,  enarrat.  Neque  vero  perplexa  est  aut  obscura  interpretatio.  Fit  enim  evangelii  et  legis  comparatio:  quod  lex  vitam  non  promittat,  nisi  iis,  qui  mandata  impleverint;  evangelium  autem  gratuitam  iustitiam  offerat,  qua  homines  Deo  reconcilientur,  ac  aeternae  salutis  haeredes  fiant.  In  hanc  rem  citatur  locus  ille:  Non  procul  est  verbum,  neque  supra  te  situm,  et  additur:  Hoc  est  verbum  fidei,  quod  praedicamus.  Si  perspicuitas  quaeritur,  quid  desideres  magis  ad  intelligendum  facile?  Si  autoritas:  coeleste  est  oraculum.  Audiendaene  igitur  iam  sunt  contra  Pighii  blasphemiae?  Sed  quoniam  bellum  coelo  denunciare  non  horret  hic  gigas,  spectemus  paulisper,  qualem  impressionem  faciat.  Totus,  inquit,  contextus  necessario  postulat,  de  lege  intelligi.  Fateor  certe  de  lege  primum,  quatenus*  ad  evangelium  transitus  est,  idque  officii  habet,  ut