6:348  verbo  suo  refulgentem  intueamur.  Unde  illa  est  Pauli  precatio,  ut  Deus  illuminatos  mentis  oculos  Ephesiis  dare  velit,  quibus  percipiant,  quae  sit  spes  vocationis  suae,  et  cum  omnibus  sanctis  comprehendant,  quae  sit  longitudo,  latitudo,  et  profunditas  (Ephes.  1,  18).  Nec  mirum,  quum  alibi  spiritualis  sapientiae  altitudinem  in  cor  hominis  ascendere  neget  (1  Cor.  2,  14).  In  secunda  classe  promissiones  constituo,  quae  conditionem  habent  annexam,  si  fecerimus  quod  postulat  Deus  a  nobis.  Nam  illis  sic  adversum  nos  pugnant:  Quorsum  pendere  a  nobis  eorum  complementum  diceretur,  quae  Deus  promittit,  si  penes  nos  non  sit  facere  ut  impleantur?  Sic  autem  illic  respondeo:  quum  fidelibus  iuxta  ac  impiis  offerantur  promissiones,  suum  apud  utrosque  usum  habere.  Impios  enim  ita  convinci,  ut  sua  indignitate  privari  se  Dei  beneficiis  agnoscant,  quae  suis  cultoribus  praestare  solet:  ut  pii  rursum  ad  timorem  et  obedientiam  Dei,  ad  veram  cordis  puritatem  et  innocentiam,  proposita  illic  benedictione,  reddantur  alacriores:  sed  spiritu  rectitudinis  freti,  non  viribus  suis.  Proinde  talibus  promissis  ablegari  doceo  ad  quaerendam  Dei  gratiam,  qua  sola  pervenire  illuc  possunt,  quo  vocantur:  Pighius  in  libero  arbitrio  retineri  putat.  Quam  opinionem  ut  confirmet,  diversum  finem  a  Moyse  fuisse  designatum,  obtendit.  Sic  enim,  promulgata  lege,  loquitur:  Considera,  quod  hodie  proposuerim  in  conspectu  tuo  vitam  et  mortem,  ete  (Deut.  30,  15).  Quasi  non  clamet  ex  opposito  apostolus,  legem,  quae  in  vitam  per  se  cedere  debuerat,  naturae  nostrae  vitio  fuisse  nobis  in  exitium  conversam  (Rom.  7,  13).  Lex  quidem  iusti  officii  exactrix  est:  sed  nos  solvendo  [pag.  161]  minime  sumus.  Lex  inaestimabile  illud  vitae  aeternae  praemium  suis  cultoribus  repositum  esse  ostendit.  Sed  nemo  est,  qui  vel  serio  saltem  conatu  adspirare  illuc  propria  virtute  queat.  Quare  Paulus,  dum  illud  adducit,  qui  fecerit  haec,  vivet  in  illis,  continuo,  quasi  re  desperata,  confugere  ad  alterum  asylum  nos  docet:  ut  gratuito  et  sine  operibus  consequamur,  quod  Deus  loco  mercedis  illic  operibus  promittit  (Gal.  3,  13).  Sed  instat  Pighius,  quia  mox  subiiciat  Moyses:  ut  facias,  et  opere  compleas.  Nempe  ut  hoc  audito  officii  nostri  necessitatem  sciamus,  et  facto  virium  nostrarum  periculo,  infirmitatis,  vel  impotentiae  potius  nostrae  convicti  dicere  Deo  cogamur:  Da  quod  iubes,  et  iube  quod  velis.  Tertia  classis  iis  sententiis  constat,  ubi  Dominus  populo  israelitico  exprobrat,  per  eum  tantum  stetisse,  quominus  omni  bonorum  genere  frueretur.  Tales  enim  exprobrationes  in  eos  congruere  non  videntur,  quibus  ad  manum  sit  haec  responsio  :  Nobis  prosperitas  cordi  erat,  adversa  timebamus.  Quod  autem  illius  adipiscendae,  horum  fugiendorum  causa,