47:348  pronuntiat  Christus  conatus  ipsorum  non  irritos  fore  nec  inutiles,  si  modo  prompti  sint  ad  obsequendum.  Neque  enim  hic  tantum  praescribit  apostolis,  quid  ferat  ac  postulet  eorum  vocatio,  sed  ne  languidi  sint  vel  frigeant,  prosperum  illis  successum  promittit.  Vix  dici  potest  quantum  habeat  momenti  haec  consolatio  adversus  tot  tentationes,  quae  quotidie  occurrunt  Christi  ministris.  Ergo  quoties  nobis  videmur  operam  ludere,  in  memoriam  hoc  veniat,  facturum  tandem  esse  Christum,  ne  ludicrum  sit  et  inane  quod  conamur.  Nam  tunc  maxime  locum  habet  promissio,  quum  nihil  fructus  apparet.  Hodie  nasuti  homines,  et  quicunque  sapere  mundo  videntur,  conatus  nostros  tanquam  inconsideratos  subsannant,  quia  frustra  tentemus  coelum  terrae  miscere:  nam  interea  fructus  votis  nostris  non  respondet.  Sed  quum  Christus  ex  adverso  pollicitus  fuerit,  sequuturum  operae  pretium  quod  ad  tempus  latet,  sedulo  inter  mundi  ludibria  in  officio  praestando  laboremus.  Quaeritur  iam,  quare  fructum  hunc  perpetuum  fore  Christus  dicat,  quum  dicit  et  fructus  vester  maneat.  Quoniam  evangelii  doctrina  animas  Christo  acquirit  in  aeternam  salutem,  multis  videtur  haec  esse  fructus  perpetuitas,  sed  ego  sententiam  longius  extendo:  nempe  quod  ad  finem  usque  mundi  statura  sit  ecclesia.  Nam  labor  apostolorum  hodie  quoque  fructificat,  et  praedicatio  nostra  non  unius  est  saeculi,  sed  ecclesiam  propagabit,  ut  post  mortem  nostram  novus  proventus  emergat.  Quum  dicit  fructus  vester',  perinde  loquitur  ac  si  partus  esset  eorum  industria,  quum  tamen  doceat  Paulus,  eos  qui  rigant  vel  plantant  nihil  esse.  Et  certe  excellentius  Dei  est  opus  ecclesiae  creatio  quam  ut  eius  gloria  hominibus  adscribi  debeat.  Sed  quia  virtutem  suam  exserit  Dominus  per  manum  hominum,  ne  frustra  laborent,  solet  etiam  in  ipsos  transferre  quod  sibi  proprium  est.  Meminerimus  interea  tam  benigne  eum  ornare  suos  discipulos,  ut  eos  animet,  non  inflet.  Ut  quidquid  petieritis.  Hoc  membrum  non  additum  fuit  ex  abrupto,  ut  multis  videri  posset.  Nam  quum  docendi  provincia  longe  superet  hominum  vires,  accedunt  innumeri  Satanae  insultus,  qui  nunquam  sustineri  possent  nisi  Dei  virtute.  Ergo  ne  deficiant  animis  apostoli,  Christus  cum  optimo  subsidio  occurrit,  ac  si  diceret:  Si  vobis  plus  erit  negotii  quam  ut  pares  sitis  ad  explendum  munus  vestrum,  non  deerit  vobis  pater  meus.  Nam  hac  lege  constitui  vos  evangelii  ministros,  ut  manum  suam  ad  vos  iuvandos  extentam  habeat  pater,  quoties  in  nomine  meo  petetis  ut  vobis  opem  ferat.  Et  certe  quod  plerique  doctores  vel  per  ignaviam  flac~  cescunt,  vel  prorsus  concidunt  desperatione,  non  aliunde  contingit,  nisi  quod  in  officio  precandi  torpent.  Proinde  haec  Christi  promissio  nos  ad  Deum  invocandum  sollicitat.  Nam  quisquis  agnoscet  a