32:348  promissio  ad  continuam  usque  seriem  pateret.  Quia  autem  non  Davidi  privatim,  sed  toti  ecclesiae  Deus  hoc  modo  prospexerat,  nunc  iubentur  fideles  bono  animo  esse:  quod  regnum  inter  eos  Deus  erexerit  non  fluxum  vel  caducum,  sed  cuius  sancta  esset  stabilitas.  Atque  utile  fuit  tam  regem  quam  populum  de  hac  extraordinaria  fultura  moneri.  Videmus  enim  quam  se  insolenter  efferant  terreni  reges:  quia  etsi  ore  fatentur  Dei  gratia  se  regnare,  tamen  in  suo  fastu  evanescunt.  Adde  quod  ut  plurimum  violenter  irrumpunt  in  solium,  ut  raro  locum  obtineat  legitima  vocatio.  Itaque  merito  a  terrenis  imperiis  discernitur  sacrum  Davidis  regnum,  quod  in  coelesti  oraculo  fundatum  erat.  12.  (Si  custodierint  filii  tui  foedus  meum.)  Nunc  apertius  progreditur  ad  illam  quam  dixi  seriem,  qua  asseritur  illius  diuturnitas.  Etsi  autem  in  hoc  mundo  regum  filii  parentibus  haereditario  iure  succedunt,  certum  est  tamen  regnum  Davidis  singulari  privilegio  eximi  a  communi  lege,  quia  diserte  pronuntiat  Deus  semper  exorituram  sobolem  quae  solium  regium  obtineat:  neque  id  uno  vel  altero  saeculo,  sed  sine  fine.  Num  etsi  deletum  fuit  regnum  illud,  brevi  tamen  sequuta  est  restitutio,  et  in  Christo  stabilita  eius  perpetuitas.  Hic  tamen  nascitur  quaestio,  An  regni  duratio  hominum  meritis  nitatur.  Nam  conditio  sub  qua  paciscitur  Deus,  innuit  non  aliter  ratum  fore  Dei  foedus,  quam  si  homines  bona  fide  respondeant.  Unde  sequitur,  effectum  gratiae  promissae  pendere  ab  eorum  obedientia.  Sed  primo  loco  tenere  convenit,  quatenus  pollicitus  est  Deus  se  missurum  redemptorem,  a  quo  speranda  esset  salus,  foedus  illud  fuisse  prorsus  gratuitum:  quia  ex  prima  adoptione  fluebat,  quae  et  ipsa  gratuita  fuit.  Et  certe  non  obstitit  impiae  gentis  perfidia  quominus  Deus  exhibito  Christo  palam  ostenderit  se  eorum  meritis  nihil  tribuere.  Ideo  dicit  Paulus,  Rom.  3,  3:  Si  quidam  eorum  fuerunt  increduli,  an  ideo  exinanita  est  Dei  veritas?  significans  Deum  favorem  suum  continuasse  erga  Iudaeos,  quia  gratis  eoa  elegerat.  Et  quum  saepius  data  opera,  visi  sint  eius  promissiones  in  nihilum  velle  redigere,  certasse  tamen  incredibili  bonitate  cum  eorum  malitia,  atque  ita  factum  esse  ut  superior  emerserit  eius  veritas:  quia  non  respexit  quid  meriti  essent,  sed  iu  suo  proposito  firmus  stetit.  Nunc  tenemus  quatenus  conditionale  non  fuerit  illud  foedus:  sed  quia  secum  trahebat  alias  accessiones,  ideo  conditio  fuit  apposita,  Si  parueritis  mandatis  meis,  ego  vobis  benedicam.  Ab  hac  obedientia  quia  desciverant  Iudaei,  in  exilium  abducti  sunt.  Ac  tunc  visus  est  Deus  foedus  suum  irritum  facere,  vel  profanare,  ut  alio  loco  vidimus.  Dissipatio  igitur  illa,  quaedam  foederis  ruptura  fuit,  sed  ex  parte  duntaxat  et  in  speciem.  Clarius  etiam  hoc  fiet  si  altius  repetamus  ex  sacra  historia  quid  paulo  post