25:348  possidendam,  quam  videbis.  29.  Mansimus  vero  in  valle  e  regione  Beth-peor.  EX  DEUT.  CAP.  IV.  21.  Iehova  iratus  fuit  contra  me  propter  verba  vestra,  iuravitque  quod  non  transirem  Iordanem,  neque  ingrederer  terram  bonam,  quam  Iehova  Deus  tuus  dat  tibi  in  haereditatem.  22.  Ego  enim  morior  in  hac  terra,  neque  transeo  Iordanem  :  vos  autem  transitis,  ut  possideatis  terram  istam  bonam.  21.  Ipsi  quoque  Iosua.  Recitat  quod  iam  vidimus,  se  Iosuam  cum  toto  populo  hortatum  esse,  ut  ad  terram  occupandam  alacriter  se  accingerent,  freti  tam  Dei  promissione,  quam  tot  illustribus  auxilii  eius  experimentis,  quae  totidem  erant  continuae  gratiae  in  futurum  tempus  pignora.  23.  Rogaveram  Iehovam.  Alii  Rogavi:  ego  autem  tempus  plusquamperfectum  ponere  malui:  quia,  meo  iudicio,  anticipat  Moses  cur  alii  partes  suas  resignaverit,  ac  non  magis  professus  sit  se  ducem,  ut  ante  fuerat,  et  simul  fortitudinis  exemplar  fore  populo.  Dicit  ergo,  quum  precatus  esset,  ut  sibi  liceret  terram  ingredi,  repulsam  se  passum  esse.  Neque  enim  probabile  est,  ex  quo  Iosue  in  suum  locum  substituerat,  contrarium  votum  mox  concepisse.  Summa  autem  precationis  est,  ut  Deus  concesso  terrae  ingressu,  omnes  gratiae  suae  numeros  erga  ipsum  compleat.  Nam  beneficia  sibi  ante  praestita,  ad  impetrandi  fiduciam  commemorat,  ut  laeta  exordia  Deus,  qui  non  solet  opus  manuum  suarum  deserere,  perducat  usque  ad  finem.  Hac  ratione  dicit  sibi  ostensam  fuisse  Dei  fortitudinem,  verecunde  subindicans,  consentaneum  esse,  ut  primis  respondeant  ultima,  praecipui  quoque  boni  se  fieri  consortem.  Potentiam  quoque  Dei  in  miraculis  extollit:  ne  tam  praeclarum  opus  abrumpatur.  Ab  altera  autem  parte,  terrae  bonitatem  commendat,  ac  nominatim  desiderium  eius  videndae  ex  pietatis  studio  manare  ostendit:  eorum  enim  sententiae  libenter  subscribo  qui  per  bonum  montem  intelligunt  Sion.  Neque  enim  praeter  Libanum,  mons  in  terra  illa  tantopere  delectabilis  fuit.  Libanus  autem,  tanquam  eius  accessio,  secundo  loco  nominatur.  26.  Iratus  autem  fuerat.  Quidam  intelligunt  huiusmodi  voto  fuisse  offensum:  sed  potius  causam  reddit  Moses  cur  non  obtinuerit  quod  petebat:  quia  scilicet  iam  ante  fuerat  exclusus.  Etsi  autem  cum  Deo  minime  litigat,  ac  si  inique  damnatus  esset  ob  alienum  crimen,  oblique  tamen  populum  perstringit:  quia  utile  erat  omnes  ipsos  commonefieri,  poenam,  quae  eximio  servo  inflicta  fuerat,  contractam  esse  ex  omnium  culpa.  Quomodo  autem  iuste