41:346  incredules.  Or  maintenant  nous  avons  a  traicter  la  responce  qui  est  ici  recitee  que  fait  Daniel  au  Roy  Balsazar.  En  premier  lieu  il  luy  declare  qu'il  ne  cerche  point  ses  dons  et  presens.  Et  toutesfois  nous  verrons  en  la  fin  du  chapitre,  comme  il  a  souffert  que  on  luy  donnast  ce  que  le  Roy  luy  avoit  promis.  Ce  n'est  pas  donc  qu'il  refuse  pleinement  ce  que  le  Roy  luy  veut  donner,  mais  il  declare  et  fait  protestation  que  ce  n'est  pas  cela  qui  le  meine,  qu'il  n'est  pas  la  venu  comme  mercenaire,  car  s'il  se  fust  arreste  a  cela,  il  eut  eu  comme  la  bouche  close,  il  falloit  qu'il  prononceast  la  sentence  contre  tout  le  Royaume  de  Chaldee,  et  s'il  y  fut  venu  comme  un  homme  a  louage,  que  eust  ce  este?  Il  ni  eust  eu  nulle  auctorite  en  tout  ce  qu'il  eust  dit,  et  mesme  cela  luy  eust  este  comme  une  bride  pour  le  retarder  de  faire  son  devoir.  Et  voila  pourquoy  sainct  Paul  requiert  entre  toutes  les  vertus,  qui  doivent  estre  en  ceus  qui  sont  ordonues  pour  prescher  la  parole  de  Dieu,  qu'ils  ne  soient  point  addonnes  a  gain  ne  a.  l'avarice,  car  c'est  une  chose  toute  repugnante  a  leur  devoir,  qu'il  sera  impossible  qu'ils  annoncent  purement  la  parole  de  Dieu,  s'ils  sont  detenus  de  quelque  convoitise  de  s'enrichir,  et  d'amasser  des  biens,  en  somme  ils  perdent  toute  liberte.  Notons  bien  donc  ce  qui  est  ici  dit:  C'est  que  Daniel  ne  refuse  pas  ce  que  le  Roy  luy  a  offert,  Mais  ce  pendant  il  declaire  qu'en  faisant  son  office  il  n'ha  esgard  ni  a  aucun  present,  ni  a  toutes  les  faveurs  du  monde,  qu'il  faut  qu'il  ait  les  ieux  fermes  a  fin  davoir  la  bouche  ouverte,  et  qu'il  declaire  ce  que  Dieu  luy  avoit  ordonne  sans  qu'il  soit  destourne  ni  de  ceci  ni  de  cela,  en  aiant  regard  aux  personnes,  et  nous  avons  desia  veu  cela  par  cy  devant,  car  il  avoit  este  esleve  du  Roy  Nabuchodonozor,  qu'il  est  comme  maistre  d'hotel  du  Palais  Roial,  et  demande  que  ses  compaignons  soient  mis  en  estat  et  dignite,  afin  que  le  pauvre  peuple  des  Iuifs  soit  d'autant  soulage.  Nous  avons  desia  veu  cela  en  Daniel,  nous  ne  dirons  pas  toutesfois  qu'il  soit  comme  un  mercenaire,  qu'il  vende  les  Propheties,  nenni,  car  il  n'en  a  iamais  rien  demande  pour  soy  au  Roy  Nabuchodonozor,  et  n'a  point  este  mene  d'avarice,  ni  dautre  telle  mauvaise  affection,  il  luy  suffisoit  d'executer  son  office  en  toute  liberte.  Voila  comme  nostre  Seigneur  Iesus  Christ,  ha  ordonne  qu'un  Ministre  de  la  parole  de  Dieu  sera  nourri:  Et  ce  pendant  toutesfois  il  condamne  les  mercenaires.  Veut  il  induire  les  Ministres  a  faire  ce  qui  leur  est  deffendu?  nenni,  mais  ces  deux  choses  ici  sont  bien  compatibles.  C'est  assavoir  qu'un  homme  qui  aura  un  vray  zele  d'edifier  l'eglise  de  Dieu,  n'ait  nul  esgart  a  soy,  qu'il  ne  cerche  nullement  les  biens  de  ce  monde.  Et  ce  pendant  cela  viendra  comme  un  accessoire,  que  quand  il  s'emploiera  entierement  pour  l'eglise  de  Dieu,  qu'il  soit  nourri,