47:344  suo  metum  et  anxietatem  in  cordibus  nostris  abolet,  unde  emergit  serena  ista  hilaritas.  Nostrum  alia  ratione  dicitur:  quia  ipso  fruimur,  ex  quo  nobis  donatum  est.  Iam  quum  pronuntiet  Christus,  se  haec  ideo  loquutum  ut  gaudium  habeant  discipuli,  ex  his  verbis  statuimus,  quicunque  in  hac  concione  rite  profecerint  habere  in  quo  acquiescant.  Manendi  verbo  significat,  non  caducum  aut  temporale  esse  gaudium,  de  quo  loquitur,  sed  quod  nunquam  excidat  vel  effluat.  Quare  discamus  quaerendam  in  Christi  doctrina  salutis  fiduciam,  quae  tam  in  vita  quam  in  morte  vigeat.  Gaudium  vestrum  completum  sit.  Addit  solidum  hoc  et  plenum  gaudium  fore:  non  quod  omni  prorsus  tristitia  vacui  sint  fideles,  sed  quod  exsuperet  gaudii  materia,  ut  nullus  unquam  metus,  nulla  anxietas,  nullus  moeror  eos  absorbeat.  Nam  quibus  in  Christo  gloriari  datum  est,  illis  neque  vita,  neque  mors,  neque  ullae  miseriae  obstabunt,  quominus  tristitiae  insultent.  12.  Hoc  est  praeceptum  meum,  ut  diligatis  invicem,  sicut  dilexi  vos.  13.  Maiorem  hac  dilectionem  nemo  habet  quam  ut  quis  animam  suam  ponat  pro  amicis  suis.  14.  Vos  amici  mei  estis,  si  feceritis,  quae  ego  praecipio  vobis.  15.  Posthac  non  dicam  vos  servos,  quia  servus  nescit,  quid  faciat  dominus  eius:  vos  autem  dixi  amicos,  quia,  quaecunque  audivi  a  patre  meo9  nota  feci  vobis.  12.  Hoc  est  praeceptum  meum.  Quum  vitam  nostram  dirigere  ad  Christi  praeceptum  conveniat,  tenendum  imprimis  est  quid  ipse  velit  ac  mandet.  Iam  itaque  repetit  quod  prius  dixerat,  sibi  ante  omnia  placere,  ut  fideles  caritatem  inter  se  mutuam  colant.  Praecedit  quidem  ordine  amor  ac  reverentia  Dei,  sed  quia  legitima  eius  probatio  est  caritas  erga  proximos,  huius  potissimum  fit  mentio.  Porro  sicuti  nuper  in  generali  doctrinae  observantia,  ita  nunc  in  specie  exemplar  nobis  proponit  quod  sequamur.  Complexus  est  enim  suos  omnes,  ut  se  mutuo  foveant.  Cur  de  amandis  incredulis  nihil  hoc  loco  diserte  praecipiat,  proximo  capite  dictum  est.  13.  Maiorem  hac  dilectionem.  Amoris  erga  nos  sui  magnitudinem  interdum  commendat  Christus,  quo  melius  salutis  nostrae  fiduciam  stabiliat.  Nunc  vero  longius  progreditur,  ut  nos  -suo  exemplo  ad  fratres  amandos  inflammet.  Utrumque  tamen  simul  coniungit:  nam  immensam  suae  bonitatis  dulcedinem  vult  a  nobis  fide  percipi  :  deinde  hac  ratione  ad  caritatis  studium  nos  allicit.  Ita  Paulus  ad  Ephesios  (5,  2):  Ambulate  in  dilectione,  sicut  et  Christus  dilexit  nos,  et  tradidit  semetipsum  pro  nobis  oblationem  et  hostiam  Deo  in  odorem  suavitatis.  Poterat  nos  Deus  verbo  aut  nutu  redimere,  nisi  aliter  nostra  causa  visum  esset,  ut  proprio  et  unigenito