32:343  343  PSALMUS  CXXXII.  344  quam  in  formula  durior  est  ac  severior  obsecratio,  ac  si  somno  ciboque  et  aliis  vitae  adminiculis  renuntiet,  donec  locus  templo  designatus  fuerit.  Atqui  temere  id  et  inconsiderato  zelo  facturus  erat:  quia  non  erat  in  eius  arbitrio  tempus  Deo  praefigere,  multorum  vero  dierum  perferre  inediam,  vel  multis  noctibus  pervigilem  durare,  non  ferebat  eius  facultas.  Ad  haec  quando  dicemus  nuncupatum  ab  eo  fuisse  votum?  Scio  quid  respondeant  ex  Hebraeis  quidam,  quum  expavefactus  angeli  conspectu  cecidit,  hoc  iusiurandum  fuisse  ab  eo  conceptum.  Fateor  quidem  paulo  post  monstratam  ei  fuisse  aream  :  sed  divinatio  est  parum  firma  et  prorsus  coacta,  restringere  ad  illum  temporis  articulum  quod  potius  de  longa  meditatione  intelligi  debet.  Porro  nihil  erit  absurdi,  si  dicamus  loquendi  genus  esse  hyperbolicum:  nec  referri  hoc  loco  conceptam  devotionis  formulam,  sed  ita  mitiganda  esse  verba:  Ne  unquam  vel  domum  ingrediar,  vel  spondam  lecti  mei  conscendam,  quin  me  ista  cura  sollicitet.  Persuasus  certo  erat,  sedem  sanctuarii  et  regni  statum  res  esse  coniunctas:  ideoque  nihil  mirum  si  neque  rex  sibi  visus  fuerit,  neque  ullis  vitae  commodis  sibi  frui  tranquille  promiserit,  donec  certior  de  loco  templi  factus  esset.  Quia  tamen  nihil  certi  habemus,  ubi  nos  destituit  scripturae  testimonium:  tantum  affero  quod  meo  iudicio  magis  est  probabile.  Sensus  autem  hic  non  male  quadrabit,  sive  domi  habitet  David,  sive  in  lecto  iaceat,  semper  anxio  et  inquieto  animo  fore,  donec  edoctus  de  perpetua  arcae  habitatione  fuerit.  Quantum  ad  votum  pertinet,  ex  hoc  loco  et  similibus  perperam  colligunt  papistae,  quidquid  absque  delectu  votorum  effutiverint,-  Deo  probari.  Nam  sicuti  Deo  vovere  quod  sibi  gratum  fore  pronuntiat,  laudabile  est:  ita  nimis  vitiosa  audacia  est,  dum  carnis  suae  sensu  ad  quidvis  vovendum  prosiliunt  homines.  Itaque  spectandum  quid  probet,  ne  praecipuo  iure  suo  fraudetur:  quia  apud  eum  potior  est  obedientia  quam  victimae.  6.  Ecce  audivimus  eam  in  Ephratha,  invenimus  eam  in  campis  sylvae.  7.  Ingrediemur  in  habitationes  eius,  adorabimus  ad  scabellum  pedum,  eius.  8.  Surge  Iehova  in  requiem  tuam,  tu  et  arca  fortitudinis  tuae.  9.  Sacerdotes  tui  induantur  iustitia,  et  mansueti  tui  exsultent.  6.  (Ecce  audivimus  eam  in  Ephratha.)  Versus  hic  valde  obscurus  est,  ut  mirum  non  sit  interpretes  in  sensu  eius  quaerendo  se  torquere.  Primum  relativo  generis  feminini  nullum  antecedens  respondet,  cogit  ergo  necessitas  ad  habitationem  referre  cuius  ante  meminit,  licet  in  numero  plurali.  In  voce  Ephratha  magis  sudatur,  ubi  nunquam  reposita  fuit  arca  foederis.  Si  de  tempore  anteacto