25:343  343  REDITUS  AD  HISTORIAM.  344  quoties  Deus  nobis  excitat  homines  excellentibus  donis  praeditos,  sic  ad  tempus  uti  ipsum  solere  eorum  opera  ut  in  manu  sua  habeat  alios  subinde  atque  alios  subrogare,  nisi  vitia  nostra  sint  obstaculo.  Unde  sequitur  praeclaris  hominum  dotibus  non  alligandam  esse  Dei  virtutem,  ac  si  mors  illorum  eius  esset  interitus.  Verum  quidem  est  praestantibus  viris  pares  raro  succedere:  nempe  quia  malitia  nostra  lucem  bonorum  spiritualium  accensam  suffocat,  et  quantum  in  se  est  exstinguit:  fixum  tamen  illud  manet,  ubi  Deus  per  eximios  et  singulares  ministros  salutem  nostram  promovet,  gustum  bonitatis  suae  dare,  ut  continuum  eius  tenorem  speremus  :  quia  opus  manuum  suarum  inchoatum  non  deserit.  Dicit  ergo  Moses,  quamvis  absit  ipse  per  mortem  ereptus,  Deum  tamen  suscepturum  ducis  partes,  vel  potius  perpetuum  fore  ducem,  sicuti  antea  experti  fuerant  Israelitae.  Sed  altero  quoque  solatio  eorum  infirmitatem  sublevat,  Iosue  successorem  sibi  designans:  alioqui  populo  promptum  fuisset  excipere,  si  Deus  praecedere  ipsos  vellet,  cur  non  id  palam  faceret  electo  vicario,  per  cuius  manum  continuaret  quod  per  Mosen  coeperat?  Ergo  hac  quoque  in  parte  docet  minime  obscurum  esse  paternum  Dei  favorem,  quia  iam  electus  sit  Iosue,  qui  curam  et  onus  regendi  populi  sustineat.  Neque  enim  suo  arbitrio  illis  obtrudit  Iosue  ac  praeficit,  sed  divinitus  vocatum  esse  pronunciat:  quanquam  non  profert  rem  incognitam,  sed  tantum  vult  meminisse  quid  illis  pridem  patefecerit  Deus;  sicut  alibi  visum  fuit.  4.  Faciet  Iehova  illis.  Promittit,  ubi  venerint  in  terram  Chanaan,  gentium  illic  omnium  victores  fore.  Quod  experientia  confirmat,  quia  idem  Deus  qui  Sehon  regem  Amorrhaeorum,  et  Og  regem  Basan  ipsis  in  manum  tradiderat,  similem  daturus  sit  successum  in  aliis  hostibus  subiugandis.  Mundus  quidem  variis  commotionibus  obnoxius  est,  sed  Deus  manet  sui  similis:  non  modo  quia  nunquam  mutatur  eius  consilium,  sed  quia  non  minuitur  eius  potentia.  Ergo  reali  (ut  loquuntur)  documento  populum  bene  sperandum  animat,  simulque  ad  exsequendum  strenue  Dei  mandatum  hortatur:  nempe  ut  deletis  omnibus  incolis  purgent  terram  Chanaan.  Saevum  quidem  et  crudele  in  speciem  id  fuit,  ne  unum  quidem  vivum  relinquere:  sed  quia  iuste  eos  Deus  ultimo  exitio  addixerat,  non  fuit  penes  Israelitas  quid  agendum  esset  inquirere,  sed  omni  disceptatione  valere  iussa  parere  oportuit  Dei  imperio.  Quod  ergo  multis  pepercerunt  eo  deterior  fuit  ipsorum  ignavia,  utpote  quos  saepius  Deus  ad  exigendam  quam  decreverat  vindictam  armaverat.  6.  Estote  fortes.  Postquam  Deum  praesto  fore  docuit  ad  opem  ferendam,  ad  magnitudinem  animi  et  constantiam  populum  hortatur.  Et  certe  una  est