6:342  velle.  Audis,  hominem  nihil  verbis  aut  monitionibus  posse  moveri,  nisi  intus  per  spiritum  voluntatem  formet  Deus.  Audis  non  indifferenter  omnibus,  sed  tantum  filiis  promissionis  hoc  dari.  Rursum:  1)  A  massa  perditionis,  quae  facta  est  per  primum  Adam,  debemus  intelligere,  neminem  posse  discerni,  nisi  quod  hoc  donum  habet  quisquis  habet,  quod  Dei  gratia  accepit.  Quos  elegit  porro,  eos  et  vocavit.  Ex  istis  nullus  perit:  quia  omnes  electi  sunt.  Electi  autem  sunt,  quia  secundum  propositum  vocati:  propositum  autem,  non  suum,  sed  Dei.  Item  paulo  post:  Scivit  Deus,  qui  sui  sint.  Horum  fides  per  caritatem  efficax  aut  nunquam  deficit,  aut  si  qui  sunt  quorum  deficit,  reparatur  antequam  vita  ista  finiatur,  et  deleta,  quae  intercurrerat,  iniquitate,  usque  ad  finem  perseverantia  deputatur.  Qui  vero  perseveraturi  non  sunt,  ac  sic  a  fide  lapsuri,  non  sunt  a  massa  illa  perditionis  praescientia  Dei  et  praedestinatione  discreti,  et  ideo  nec  secundum  propositum  vocati:  ac  per  hoc  nec  electi.  Quantum  vero  ad  nos  pertinet,  inquit,  2)  qui  praedestinatos  a  non  praedestinatis  discernere  non  valemus,  et  ob  hoc  omnes  salvos  fieri  velle  debemus,  omnibus  ne  pereant,  vel  ne  alios  perdant,  adhibenda  est  a  nobis  medicinaliter  severa  correptio:  Dei  autem  est,  illis  eam  facere  utilem,  quos  ipse  praescivit  et  praedestinavit.  Nonne  iam  in  Pighio  cernunt  omnes,  quod  nuper  dixi?  Prostitutae  linguae  homines  susque  deque  habere,  quale  illud  sit  quod  dicunt,  modo  non  prorsus  taceant.  Illae,  inquit,  obiectiones  merito  in  eos  conferuntur,  qui  dicunt  solo  Dei  bene  placito  discerni  homines,  et  alios  quidem  donari  gratia,  alios  praeteriri  ac  destitui,  prout  Deo  visum  fuerit:  ad  Augustinum  vero  nihil  pertinent.  Atqui  nihil  agere  aliud  toto  libro  Augustinum  palam  est.  Merito,  inquit,  sic  loquitur  Augustinus.  O  homo,  in  praeceptione  cognosce,  quid  agere  debeas;  in  correptione  [pag.  1531  cognosce,  tuo  te  vitio  non  habere;  in  oratione  cognosce,  unde  accipias.  Sed  quo  pacto  hoc  dicat  Calvinus,  qui  negat  in  hominis  esse  potestate  ante  perceptam  gratiam  eam  quaerere  aut  appetere?  Imo  cur  plus  Augustino  quam  mihi  concedit,  qui  nihilo  minus  quam  ego  illud  ipsum  subinde  in  ore  habet?  Quid  enim  vox  illa  significat:  Convertine  posses,  nisi  vocareris?  Nonne  ille  qui  te  vocavit  aversum,  ipse  praestitit  ut  convertereris?  Noli  ergo  tibi  arrogare  conversionem  tuam:  quia  nisi  ille  te  vocaret  fugientem,  non  posses  converti.  Quid  item  altera:  Vocat  nos  sine  nobis?  Quid  tertia:  Non  tantum  ut  ex  nolentibus  faciat  volentes,  sed  ex  repugnantibus  etiam  obsequentes.3)  Et  1)  Caput  7.  2)  Caput  16.  3)  In  psal.  84.  De  gratia  et  libero  arbitrio.  22*