52:342  posita  gloriatur.  Laudat  etiam  Onesimum,  ut  reliquos  animet  eius  exemplo.  Et  quoniam  dura  est  eorum  conditio  qui  servire  Christo  volunt,  similitudines  sumit  tam  ab  agricolis  quam  a  militibus:  quorum  priores  multum  laboris  in  culturam  terrae  impendere  non  dubitant,  priusquam  ullus  fructus  appareat:  hi  vero  se  abdicant  curis  et  negotiis  omnibus,  ut  se  totos  armis  et  imperatori  suo  addicant.  Postea  brevem  evangelii  sui  summam  complexus,  Timotheo  praecipit  ut  eam  aliis  quoque  tradat,  et  curet  ad  posteros  propagari.  Hinc  iterum  mentione  vinculorum  suorum  facta,  in  sanctam  iactantiam  exsurgit,  ut  animi  sui  magnitudine  pios  erigat.  Nam  quae  nos  in  coelo  corona  maneat,  omnes  secum  intueri  iubet.  Ad  haec  iubet  a  disputationum  pugnis  et  vanis  quaestionibus  abstinere,  aedificandi  studium  ex  adverso  commendans.  Et  quo  melius  constet  quam  capitale  sit  malum,  quosdam  refert  fuisse  eo  perditos,  et  nominatim  duos  commemorat,  Hymenaeum  et  Philetum:  qui  in  prodigiosum  delirium  prolapsi,  ita  ut  subverterent  fidem  resurrectionis,  horrendam  suae  vanitatis  poenam  dederant.  Sed  quia  grave  offendiculum  afferre  solent  eiusmodi  lapsus,  praesertim  hominum  insignium  et  qui  in  aliqua  existimatione  fuerunt,  docet  non  debere  hinc  pios  turbari:  quia  non  omnes  qui  profitentur  Christi  nomen,  vere  Christi  sint:  et  ecclesiam  huic  miseriae  obnoxiam  esse  oporteat,  ut  inter  malos  et  impios  habitet  in  hoc  mundo.  Quod  tamen  ne  ultra  modum  percellat  infirmas  mentes,  prudenter  temperat:  quia  Dominus  suos,  quos  elegit,  ad  finem  usque  servet.  Redit  postea  ad  Timotheum  exhortandum  quo  fideliter  ministerium  suum  exsequi  pergat.  Et  quo  plus  illi  sollicitudinis  incutiat,  praedicit  quam  infesta  bonis  et  piis  tempora  immineant,  quam  perniciosi  22*