25:342  non  parum  valuit,  ut  non  solum  mansueta  docilitate  se  tunc  doctrinae  subiicerent,  sed  ut  in  posterum  penitus  infixa  maneret  eorum  cordibus.  Scimus  quanta  attentione  excipi  soleant  ultimae  morientium  voces:  Moses  ad  mortem  obeundam  Dei  mandato  iam  accinctus,  apud  populum  verba  fecit,  quasi  extremum  vale  dicturus.  Ergo  ad  fidem  et  dignitatem  prophetici  muneris  accessit  vis  testamenti  et  autoritas.  Sicuti  porro  tota  vita  de  populi  salute  incredibili  modo  sollicitus  fuerat,  ita  nunc  curam  plus  quam  paternam  longius  extendit.  Et  certe,  pios  doctores,  quantum  in  se  est  prospicere  convenit,  ut  ipsis  superstes  vigeat  laborum  suorum  fructus.  Cuius  sedulitatis  exemplum  Petrus  in  se  proponit.  Iustum  (inquit)  arbitror,  quamdiu  sum  in  hoc  tabernaculo,  excitare  vos  per  commonitionem:  quin  et  dabo  semper  operam  :  ut  post  obitflfm  meum  harum  rerum  possitis  esse  memores  (2.  Pet.  1,  13).  2.  Dixitque  eis:  Centum  et  viginti.  Quamvis  superbe  et  fastidiose  saepius  reiectus  fuisset  Moses,  fieri  tamen  non  potuit  quin  eius  discessus  et  summum  moerorem  afferret,  et  incuteret  gravem  metum.  Ergo  aetate  sua  proposita,  anxietatem  solatur,  et  tristitiam  mitigat:  deinde  alia  quoque  ratione  compescit  eorum  querimonias,  quia  Deus  terminum  eius  vitae  fixerit.  Levamen  ergo  adducit,  quia  et  mors  sit  plus  quam  matura,  neque  iam  ferendis  laboribus  in  tanta  senectute  sufficiat.  Hic  tamen  nascitur  quaestio:  Quomodo  se  caducum  esse  et  fractis  viribus  dicat:  quia  paulo  post  videbimus,  integris  sensibus  viguisse  usque  ad  mortem.  Sed  solutio  facilis  est,  non  ideo  prae  senio  futurum  inutilem  fuisse,  quia  vel  oculis  hebes  esset,  vel  aliis  membris  tremulus,  sed  quia  aetas  non  ferebat  ut  diutius  solitum  munus  obiret.  Nam  praeter  naturae  rationem,  mirabiliter  ad  tempus  illud  conservatus  fuerat:  sed  quia  iam  ad  metam  cursus  sui  pervenerat,  subito  collabi  necesse  erat,  et  facultate  destitui.  Porro  Egredi  et  Ingredi  tantundem  valet  ac  vitae  functiones  peragere.  Sic  in  Psalmo  (121,  8)  dicitur:  Nosti  introitus  meos  et  egressus.  Et  hac  ratione  dicitur  David  ingressus  et  egressus  esse  quum  exsequeretur  munus  sibi  a  Saule  iniunctum  (1.  Sam.  18,  5).  Secundo  loco  ubi  commemorat  se  excludi  a  terra  Chanaan,  et  prohiberi  eius  ingressu  :  oblique  populum  perstringit,  cuius  culpa  Deus  excanduerat  contra  Mosen  ipsum  et  Aharon.  Itaque  hac  tacita  exprobratione  admoniti  fuerunt  Israelitae  ut  patienter  iustam  ingratitudinis  suae  poenam  ferrent.  Interea  sicuti  se  morigerum  ostendit  Dei  decreto,  ita  eos  acquiescere  iubet.  3.  Iehova  Deus  tuus.  Hic  non  vulgari  consolatione  ad  novam  alacritatem  erigit  eorum  animos  :  quia  sensuri  sint  ipso  quoque  mortuo  perennem  Dei  gratiam.  Unde  colligitur  apprime  utilis  doctrina,