54:341  SUR  LA  SECONDE  A  TIMOTHEE.  incomprehensible.  Voila  qu'emporte  ce  mot,  Quant  au  reste.  Et  ainsi  advisons  de  recueillir  tellement  les  graces  de  Dieu  que  nous  avons  receues  par  ci  devant,  que  nostre  conclusion  finale  soit  de  dire,  Dieu  qui  a  commence  parfera:  ainsi  que  sainct  Paul  le  declare  au  premier  des  Philippiens.  Et  aussi  quand  il  dit  aux  Corinthiens,  que  Dieu  qui  a  espandu  ses  largesses  sur  eux  ne  leur  defaudra  en  rien  qui  soit  pour  leur  salut,  iusques  a  la  venue  de  nostre  Seigneur  Iesus  Christ:  par  cela  il  nous  monstre  ceste  doctrine,  c'est  qu'il  ne  faut  point  que  nous  le  remercions  seulement  de  ce  que  nous  avons  desia  senti  de  sa  bonte,  mais  que  nous  passions  par  dessus  le  monde,  et  que  nous  ne  doutions  point  que  puis  qu'il  nous  a  adoptez,  qu'il  nous  conduira  iusques  a  cest  heritage  immortel  du  Royaume  des  cieux.  Combien  que  nous  ayons  beaucoup  de  mauvaises  rencontres,  que  nous  pourrions  estre  descouragez,  que  mesmes  nous  voyons  les  gouffres  ouverts  de  toutes  parts,  que  nous  ayons  tousiours  comme  un  pied  en  la  fosse,  que  nous  soyons  affligez  de  beaucoup  de  hazards,  que  le  diable  mesmes  ait  la  principaute  en  l'air,  neantmoins  esperons  en  nostre  Dieu,  et  ne  doutons  point  qu'il  ne  face  valoir  nostre  adoption,  iusques  a  tant  que  nous  possedions  les  choses  que  nous  esperons  maintenant,  d'autant  qu'elles  ne  nous  sont  point  encores  presentes.  Mais  il  semble  bien  de  prime  face  que  sainct  Paul  s'attribue  ici  quelques  merites,  quand  il  dit  que  la  couronne  de  iustice  luy  est  apprestee.  Et  de  faict,  les  Papistes  quand  ils  veulent  approuver  leur  Franc-arbitre,  et  leurs  oeuvres  meritoires,  alleguent  ce  passage,  Comment?  Voila  sainct  Paul  qui  dit  que  la  couronne  de  iustice  luy  est  appareillee.  Il  faut  donc  qu'il  ait  este  iuste  en  ses  oeuvres.  Ainsi  on  voit  que  nous  ne  sommes  point  sauvez  par  la  seule  foy  (disent-ils),  mais  quand  nous  avons  desservi,  Dieu  nous  recompense,  comme  ceux  qui  auront  bien  travaille.  Or  en  premier  lieu,  il  nous  faudroit  scavoir  dont  nous  vienent  toutes  nos  vaillances.  Y  a-il  homme  qui  s'ose  vanter  d'avoir  nulle  suffisance  en  soy  pour  soustenir  un  seul  combat?  Quand  sainct  Paul  parle  de  ceux  qui  sont  de  son  estat,  c'est  a  dire  qui  ont  la  charge  d'anoncer  l'Evangile,  Nous  ne  sommes  point  suffisans,  dit-il.  Et  de  quoy  faire?  Il  ne  dit  point  de  persister,  il  ne  dit  point  de  nous  porter  vertueusement  en  quelque  persecution,  il  ne  dit  point  d'edifier  une  Eglise,  il  ne  point  de  resister  au  mal  pour  un  coup,  il  ne  dit  point  de  nous  exposer  a  la  mort,  et  d'estre  prests  de  quitter  nostre  vie,  et  tout  ce  qu'il  y  a:  mais  seulement  (dit-il)  d'avoir  une  seule  bonne  pensee:  nous  ne  sommes  point  idoines  a  cela  (dit-il)  sinon  que  la  suffisance  nous  viene  n'enhaut.  Que  les  hommes  aillent  maintenant  s'exalter,  et  qu'ils  facent  les  braves,  qu'ils