52:341  341  ARGUMENTUM.  Ex  historia  Lucae  vix  certo  colligi  potest  quando  scripta  fuerit  prior  epistola.  Non  tamen  dubito  quin  ab  eo  tempore  Timotheum  coram  alloquutus  fuerit  Paulus,  et  fieri  quoque  potest  (si  receptae  famae  creditur)  ut  eo  comite  ac  adiutore  multis  in  locis  usus  fuerit.  Fuisse  tamen  adhuc  Ephesi  quum  ad  eum  scriberetur  haec  epistola,  colligere  promptum  est:  quia  Paulus  sub  finem  Priscillam  et  Aquilam  et  Onesiphorum  salutat.  Quorum  ultimus  fuit  Ephesius,  alios  autem  illic  substitisse  quum  in  Iudaeam  navigaret  Paulus,  testis  est  Lucas.  Hic  autem  praecipuus  est  cardo  in  quo  versatur,  ut  Timotheum  tam  in  fide  Evangelii,  quam  in  constanti  sinceraque  eius  praedicatione  confirmet.  Sed  non  parum  his  exhortationibus  momenti  addit  temporis  circumstantia.  Mortem  habebat  Paulus  ante  oculos,  quam  subire  paratus  erat  pro  evangelii  testimonio.  Quaecunque  igitur  hic  legimus  de  Christi  regno,  de  spe  vitae  aeternae,  de  christiana  militia,  de  fiducia  confessionis,  de  certitudine  doctrinae  :  non  tanquam  atramento  scripta,  sed  ipsius  Pauli  sanguine  accipere  convenit.  Nihil  enim  asserit  pro  quo  mortis  suae  pignus  non  opponat.  Proinde  haec  epistola  quasi  solennis  quaedam  est  subscriptio  paulinae  doctrinae:  eaque  ex  re  praesenti.  Iam  vero  memoria  tenere  operae  pretium  est  quod  in  priore  epistola  admonuimus,  non  unius  tantum  hominis  causa  scripsisse  apostolum,  sed  proposuisse  sub  unius  persona  communem  doctrinam,  quae  postea  aliis  per  eius  manum  traderetur.  Ac  primum  quidem  laudata  fide  Timothei  in  qua  educatus  fuerat  a  puero,  ut  in  doctrina  quam  didicerat,  et  in  munere  sibi  commisso  fideliter  perseveret,  eum  hortatur:  et  simul,  ne  propter  sua  vincula  aut  aliorum  defectiones  labascat,  de  suo  apostolatu  et  mercede  sibi  re-