54:340  poser  en  luy  comme  en  celuy  qui  ne  nous  peut  frustrer.  Ainsi  donc  apprenons  que  nous  ne  pouvons  pas  nous  glorifier  avec  sainct  Paul  d'avoir  combatu  vaillamment,  et  d'avoir  l'issue  heureuse,  sinon  que  nous  soyons  tout  persuadez,  que  nostre  Dieu  ne  nous  a  point  appelez  en  vain.  Il  faut  aussi  que  nous  ayons  les  promesses  par  lesquelles  il  nous  a  mis  en  chemin  pour  esperer  le  salut  immortel  qui  nous  est  reserve  au  ciel:  il  faut  que  nous  ayons  tousiours  ces  promesses-la  devant  nos  yeux,  et  en  nostre  memoire.  Et  notamment  il  dit,  Quant  au  reste:  comme  s'il  disoit.  Il  est  vray  que  ie  me  voy  ici  en  terribles  angoisses,  et  ie  cognoy  que  ie  suis*  creature  fragile:  mais  tant  y  a  que  mon  Dieu  qui  iusques  ici  m'a  secouru,  ne  me  defaudra  point,  et  aussi  ie  me  fie  en  luy,  pour  l'advenir,  comme  i'ay  experimente  sa  grace  le  temps  passe,  et  en  toute  ma  vie.  Et  c'est  ainsi  que  nous  en  devons  faire,  c'est  ascavoir  que  nostre  foy  ne  s'estende  pas  seulement  iusques  a  la  veue  des  choses  presentes,  mais  qu'elle  surmonte  le  monde.  Et  de  fait  ce  n'est  point  sans  cause  que  l'Apostre  dit  que  c'est  une  vision  des  choses  invisibles,  et  un  fondement  des  choses  absentes.  Il  est  vray  que  cela  nous  semble  estrange,  Comment?  de  voir  les  choses  invisibles?  cela  n'est  point  possible.  Il  est  vray:  mais  Dieu  nous  donne  des  yeux  qui  sont,  non  point  pour  appercevoir  ce  que  qui  est  apparent  selon  le  monde,  mais  les  yeux  de  la  foy  percent  les  cieux.  Combien  donc  que  selon  le  sens  humain,  et  nostre  raison,  l'esperance  que  Dieu  nous  donne  soit  cachee,  si  ne  laissonsnous  pas  d'en  estre  asseurez  quand  nous  avons  le  miroir  de  sa  parole,  et  que  nostre  foy  s'addresse  a  luy.  Voila  ou  nous  iettons  nostre  ancre,  non  point  seulement  a  une  centeine,  ou  de  pas,  ou  de  coudees,  mais  nous  la  iettons  iusqnes  au  ciel,  comme  il  en  est  parle  en  l'Epistre  aux  Hebrieux.  Et  ainsi  notons  que  pour  cheminer  constamment,  et  pour  ne  point  tourner  bride  quand  nous  serons  au  bon  chemin,  mais  plustost  pour  bien  advancer,  il  nous  faut  estre  asseurez  que  iamais  Dieu  ne  nous  defaudra,  et  combien  que  nous  soyons  empeschez  par  les  fascheries  que  nous  endurerons,  ne  venir  a  luy  pour  nous  cacher  sous  l'ombre  de  ses  ailes,  et  pour  l'invoquer  comme  nostre  Pere,  toutesfois  si  nous  faut-il  ceste  resolution-la,  que  la  couronne  de  iustice  nous  est  apprestee?  Et  pourquoy?  Car  quand  il  nous  a  mis  en  oeuvre,  ce  n'a  pas  este  pour  nous  plaequer  la,  et  pour  veoir  ce  que  nous  ferions:  mais  il  a  promis  de  nous  donner  vertu  et  constance.  Et  ainsi  attendons  la  victoire  de  luy,  et  ne  craignons  pas  qu'elle  ne  nous  soit  desia  toute  apprestee,  comme  si  nous  la  tenions  en  la  main:  mais  il  veut  que  nous  luy  facions  cest  honneur,  d'esperer  ce  que  nous  ne  voyons  point,  et  ce  qui  nous  est  mesmes