51:340  quand  nous  le  cercherons  en  foy.  Au  dernier  iour,  et  apres  le  iugement,  nous  aurons  des  yeux  renouveiez,  comme  dit  S.  Iean.  Et  d'autant  que  nous  serons  semblables  a  Dieu  et  transfigurez  en  sa  gloire,  nous  le  verrons  alors  tel  qu'il  est:  ce  qu'auiourd'huy  nous  ne  pouvons  pas,  selon  que  nous  avons  nos  entendemens  rudes.  Et  c'est  assez  que  nous  le  contemplions  comme  en  un  miroir  et  en  obscurite  (ainsi  que  sainct  Paul  en  parle)  et  que  nous  cognoissions  en  partie.  Voila  donc  comme  nostre  Seigneur  Iesus  Christ  rendra  le  Royaume  a  Dieu  son  Pere,  c'est  d'autant  que  nous  contemplerons  la  maieste  de  Dieu  et  son  essence,  qui  nous  est  auiourd'huy  incomprehensible.  Car  nous  aurons  change  de  nature,  nous  serons  reformez  en  la  gloire  celeste,  ayans  despouille  toute  ceste  corruption  de  laquelle  nous  sommes  maintenant  environnez.  Et  toutesfois  ce  n'est  pas  a  dire  que  Iesus  Christ  soit  aneanti,  car  alors  il  sera  beaucoup  mieux  en  sa  perfection.  Comme  il  est  dit  au  3.  chap.  des  Colossiens,  que  nostre  vie  est  cachee  en  Dieu  avec  Iesus  Christ:  mais  quand  Iesus  Christ  sera  apparu,  qu'alors  nostre  vie  sera  aussi  bien  manifestee.  Brief,  quand  nous  serons  parvenus  a  la  souveraine  felicite  qui  nous  a  este  acquise,  alors  nous  aurons  ce  qui  gist  maintenant  en  esperance,  et  Iesus  Christ  recueillera  tout  a  soy,  tellement  qu'alors  nous  serons  participans  de  sa  gloire,  chacun  selon  son  degre  et  mesure.  Voila  donc  comme  s'accordent  tres  bien  ces  deux  passages  :  c'est  que  Iesus  Christ  rendra  le  royaume  a  Dieu  son  Pere.  Et  pourquoy?  Car  alors  nous  verrons  sa  maieste  celeste,  de  laquelle  nous  ne  sommes  point  maintenant  capables.  Et  pourquoy?  car  nous  sommes  charnels.  Et  aussi  nous  sentirons  que  quand  Iesus  Christ  nous  est  apparu  homme  mortel,  que  tellement  il  a  este  glorifie  en  sa  nature  humaine,  que  vrayement  il  est  Dieu,  d'une  mesme  essence  avec  son  Pere.  Cela  (di-ie)  sera  pleinement  cognu,  la  ou  auiourd'huy  nous  n'en  avons  qu'un  petit  ombrage.  Au  reste,  apprenons  que  quand  Iesus  Christ  a  este  exalte  de  Dieu  son  Pere,  c'a  este  a  fin  que  sa  hautesse  nous  serve  a  nostre  salut  eternel.  Et  voila  pourquoy  aussi  au  neufieme  chapitre  d'Isaie,  il  est  appele  Pere  du  siecle  a-venir,  a  fin  que  nous  cognoissions  qu'il  ne  nous  est  pas  donne  seulement  pour  ceste  vie  transitoire,  mais  que  la  substance  de  la  foy  qui  est  fondee  en  luy,  est  au  ciel,  et  qu'alors  nous  sentirons  le  fruict  de  ce  qui  est  maintenant  cache,  et  que  nous  goustons  seulement  en  partie,  et  entrerons  en  possession  parfaite  de  tous  les  biens  qui  luy  sont  maintenant  donnez.  Voila  donc  pourquoy  sainct  Paul  notamment  a  fait  mention  du  siecle  a-venir.  Il  adiouste  quant  et  quant,  que  Dieu  a  mis  toutes  choses  sous  ses  pieds,  et  Va  establi  Chef  en