25:340  nit  in  quo  mortuus  est  Aharon  :  qui  procul  distabat,  et  situs  erat  a  parte  opposita.  Illinc  usque  ad  Epiphaniam  Syriae,  quae  vocatur  Hemath,  porrigebatur:  duas  enim  urbes  eiusdem  nominis  fuisse  Hieronymo  assentior:  et  certe  probabile  est,  a  propheta  Amos  vocari  Antiochiam  Hemath  magnam  comparatione  minoris  cuius  nunc  fit  mentio,  cui  nomen  imposuit  impius  ille  et  crudelis  tyrannus  Epiphanes.  An  vero  Antiochia  maior  olim  dicta  fuerit  Hemath  et  Riblah  (sicuti  tradit  Hieronymus)  in  medio  relinquo.  Deinde  transibat  Sedad  et  Ziphon,  ultimus  finis  erat  villa  Enan.  Illinc  terminus  orientalis  transibat  per  Sepham  et  Riblah,  et  Ain,  donec  perveniret  ad  lacum  Genezare,  qui  lacus  est  satis  celebris,  et  vocatur  mare  Cinnereth.  Ita  terminus  orientalis  ab  Arabia  respiciebat  versus  Persidem:  a  plaga  vero  aquilonari  sita  erat  Babylon.  13.  Praecepit  autem  Moses.  Repetitio  est,  sed  non  superflua,  quia  sortem  novem  tribuum  et  dimidiae  superiori  donationi  opponit.  Quae  enim  mox  additur  exceptio:  Rubenitis  et  Gaditis  et  dimidiae  tribui  Manasse  agros  fuisse  concessos  ultra  Iordanem,  non  excludit  eos  a  parte  haereditatis  promissae,  ac  si  tanquam  exhaeredati  ablegarentur  extra  fines  a  Deo  praescriptos:  sed  a  sorte  duntaxat,  quia  extra  ordinem  a  fratribus  suis  obtinuerant  quod  in  communi  haereditate  alioqui  censeri  debuit  comprehensum.  Non  quod  ab  initio  id  fuerit  patefactum,  sed  quia  Deus  pro  sua  indulgentia  ratum  habuit  postulatum,  quo  fines  terrae  ampliabant.  Et  certe  absurdum  fuisset,  ac  si  abdicati  essent  a  familia  Abrahae,  nullum  illis  inter  fratres  locum  dari  in  terra  promissa.  Ac  nuper  vidimus,  partem  hanc  quae  videtur  ab  aliis  separari,  inclusam  fuisse  limitibus  a  Deo  positis.  Simpliciter  ergo  voluit  Moses  sortitioni  subiicere  quidquid  restabat.  16.  Loquutus  est  Iehova.  Emergit  quaestio  :  Si  terram  sortiri  inter  se  oportuit  filios  Israel,  quorsum  interposita  fuerit  iudicum  autoritas,  ac  si  eorum  esset  quidquam  decernere?  Atqui  si  expendimus  quod  paulo  ante  dictum  est,  spectandum  in  distribuenda  terra  fuisse  numerum  cuiusque  tribus,  utroque  opus  fuit  :  ut  suo  decreto  ostenderet  Deus  quae  cuiusque  esset  regio,  deinde  accederet  dimensio  pro  hominum  multitudine.  Sortitio  enim  necessaria  fuit:  quia  plagam  maritimam  refugissent  multi,  praetulissent  sinum  terrae  extremitatibus,  noluissent  relegari  in  montes:  denique  murmuribus  et  rixis  inter  se  certassent  absque  modo.  Hac  ratione  iactae  sortes,  quarum  iudicio  Deus  singulas  tribus  locavit  in  qua  placuit  statione:  sic  tamen  ut  prius  iudices  cum  sacerdote  et  Iosua  terram  in  decem  provincias  partiti  sint.  Postquam  vero  cognitum  fuit  in  qua  singulae  tribus  plaga  habitarent,  ac  si  Deus  illic  hospitia  designasset,  iterum  sententiam  hominum