40:34  quanquam  visio  non  tantum  eius  causa  privatim  oblata  fuit,  sed  (quemadmodum  admonui)  in  usum  totius  ecclesiae.  Fuit  ergo  color  diversus  ab  igne,  ut  inde  colligeret  propheta,  ignem  illum  esse  coelestem:  deinde  symbolum  esse  gloriae  Dei,  et  non  habere  similem  formam  igni  communi.  Nunc  sequitur,  5.  Et  e  medio  eius  similitudo  quatuor  animalium  ,  et  hic  adspectus  eorum,  similitudo  hominis  ipsis.  Cur  Deus  sub  forma  quatuor  animalium  ostenderit  quatuor  angelos  prophetae  suo,  iam  diximus.  Necesse  enim  fuit  aliquantum  deflectere  a  sanctuario,  quoniam  frigebat  totus  legalis  cultus  apud  homines  profanos.  Deus  ergo  quasi  e  coelo  descendit,  et  apparuit  familiariter  in  terra:  ac  si  diceret  se  non  tantum  regnare  sursum  inter  suos  angelos,  sed  hic  exercere  suam  virtutem,  quia  angeli  versentur  in  terra,  et  occupent  omnes  mundi  plagas.  Summa  est,  Dei  providentiam  ubique  diffusam  esse.  Dicit  autem  fuisse  in  illis  animalibus  formam  hominis:  quod  non  videtur  consentaneum  esse  cum  reliquo  contextu.  Paulo  post  dicet  fuisse  singulis  animalibus  quatuor  capita,  deinde  fuisse  pedes  rotundos,  aut  vitulinos,  ut  alii  vertunt:  sed  hic  dicit  fuisse  formam  hominis.  Solutio  est,  quamvis  aliquid  fuerit  diversum,  tamen  formam  hominis  primas  tenuisse.  Nec  vero  dubium  est  quin  Cherubim  conspecti  fuerint  a  propheta  tanquam  Dei  angeli.  Alae  etiam  non  conveniunt  hominibus:  sed  intelligit  staturam  ipsam,  ut  loquuntur,  fuisse  humanam.  Quamvis  ergo  non  prorsus  fuerint  hominibus  similes,  tamen  quoad  totum  corpus,  fuit  humana  similitudo.  Nunc  ergo  tenemus  cur  dicat  similitudinem  fuisse  hominis.  Sequitur,  6.  Et  quatuor  facies  cuique,  et  quatuor  alae  cuique  ex  ipsis.  Iam  venit  ad  ipsa  capita  et  alas.  Volunt  tamen  multi  fuisse  quaterna  capita  animalibus  :  deinde  in  singulis  capitibus  apparuisse  quatuor  formas:  alas  etiam  extendunt  multo  longius,  quia  affingunt  singulis  quatuor  capitibus  quatuor  alas:  alii  vero  sedecim.  Sed  non  videtur  hoc  congruere  prophetae  verbis.  Dicit  simpliciter  fuisse  quatuor  capita  unicuique,  deinde  quatuor  alas.  Respondent  inter  se  alae  et  capita,  sed  unum  animal  tantum  quatuor  capitibus  fuit  praeditum.  Non  ergo  plures  alas  habuit  quam  quatuor:  et  hoc  iterum  melius  patebit  ex  contextu.  Postea  adiungit,  7.  Et  pedes  eorum  pes  rectus,  et  planta  pedis  eorum  tanquam  planta  pedis  vituli  (ego  ex  hoc  loco  3