3:34  crainte  et  terreur:  c'est  assavoir,  que  ce  nouvel  Evangile,  ainsi  l’appellent-ils,  ne  cherche  autre  chose  qu'occasion  de  seditions  et  toute  impunité  de  mal  faire.  Car  Dieu  n'est  point  Dieu  de  division,  mais  de  paix:  et  le  Fils  de  Dieu  n'est  point  ministre  de  peché,  qui  est  venu  pour  rompre  et  destruire  les  oeuvres  du  diable.  Et  quant  à  nous,  nous  sommes  iniustement  accusez  de  telles  entreprises,  1  )  desquelles  nous  ne  donnasmes  iamais  le  moindre  souspeçon2)  du  monde.  Et  il  est  bien  vray  semblable  que  nous,3)  desquels  iamais  n'a  esté  ouye  une  seule  parolle  seditieuse,  et  desquels  la  vie  a  tousiours  esté  cogneue  simple  et  paisible,  quand  nous  vivions  sous  vous,  Sire,4)  machinions  de  renverser  les  royaumes!  Qui  plus  est,  maintenant  estans  chassez5)  de  noz  maisons,  nous  ne  laissons  point  de  prier  Dieu  pour  vostre  prosperité,  et  celle  de  vostre  regne.  Il  est  bien  à  croire  que  nous  pourchassions  un  congé  de  tout  mal  faire,  sans  estre  reprins:  veu,  combien  que  noz  moeurs6)  soyent  reprehensibles  en  beaucoup  de  choses,  toutesfois  qu'il  n'y  a  rien  digne  de  si  grand  reproche.  Et  davantage,  graces  à  Dieu,  nous  n'avons  point  si  mal  profité  en  l'Evangile,  que  nostre  vie  ne  puisse  estre  à  ces  detracteurs  exemple  de  chasteté,  liberalité,  misericorde,  temperance,  patience,  modestie,  et  toutes  autres  vertuz.  Certes  la  verité  tesmoigne  evidemment  pour  nous,  que  nous  craignons  et  honorons  Dieu  purement,  quand  par  nostre  vie  et  par  nostre  mort  nous  desirons  son  Nom  estre  sanctifié.  Et  la  bouche  mesme  des  envieux  a  esté  contrainte  de  donner  tesmoignage  d'innocence  et  iustice  exterieure,7)  quant  aux  hommes,  à  aucuns  de  nous,  lesquels  on  faisoit  mourir  pour  ce  seul  poinct,  qui  meritoit  louange  singuliere.  Or  s'il  y  en  a  aucuns  qui  sous  couleur  de  l'Evangile  esmeuvent  tumultes,