7:338  ad  causae  defensionem  spectat,  verbum  amplius  non  addam,  nisi  quod  lectores  admonebo,  non  esse  cur  valde  commoveri  debeant,  quum  audiunt  tam  exseerandum  crimen  Farello  aliquando  eiusque  similibus  obiectum  fuisse.  Neque  enim  novum  est  Satanam  talibus  machinis  adoriri  Christi  servos,  ut  eos  suggillando  evangelium  infamet.  Taceo  quam  odiose  traductum  initio  fuerit  christianum  nomen,  dum  impii  iactabant  Christianos  infanticidas  esse  et  qui  religionem  suam  sanguinis  humani  potu  sancirent,  praeterea  homines  turbulentos  et  publici  status  perturbatores,  item  caput  asini  habere  in  sacrario  reconditum,  quod  pro  Deo  colerent.  Innumerae  erant  eius  generis  criminationes,  quibus  imperitorum  animi  ab  improbis  et  astutis  Satanae  ministris  imbuebantur,  ut  a  Christianis  tanquam  a  scelesta  aliqua  nefandaque  factione  abhorrerent.  Longum  esset  commemorare  quot  et  quam  gravibus  calumniis  gravati  fuerint  eximii  quique  omnium  saeculorum  ecclesiae  doctores.  Praesentibus  exemplis  contenti  simus.  Scitur  quam  indignis  [pag.  91]  criminibus  conati  sint  initio  papistae  Lutherum  infamare,  ut  mundo  exosam  redderent  eius  doctrinam;  neque  enim  puduit  eos  huc  usque  progredi,  negare  ipsum  Mariae  virginitatem.  Et  quid  non  probri  in  eum  congerere  ausi  sunt?  In  nos  quoque  omnes  quid  non  exsecrationum  evomunt  furiosi  monachi,  dum  in  Christi  doctrinam  debacchantur?  Si  illis  adhibeatur  fides,  peiores  sunt  daemonibus  quicunque  puram  evangelii  doctrinam  sequuntur.  Ita  hoc  Satanae  flabellum,  excitando  horribili  incendio,  hoc  sibi  commodum  fore  putavit,  si  aliqua  infamia  apud  ignaros  flagraret  nomen  Farelli.  Et  sane  ita  comparatos  animis  esse  decet  Christi  servos,  ut  pergant  intrepidi  per  infamiam  et  bonam  famam,  sicut  Paulus  monet.  Sed  interea  falluntur  improbi  criminum  architecti  qui  Satanae  operam  suam  mentiendo  locant.  Nam  omnes  eorum  calumniae,  etiam  si  non  diluantur,  sponte  evanescunt.  Quo  magis  ridiculus  est  Carolus  qui  inani  sonitu  suarum  iactantiarum  Lutheranos,  ut  vocat,  territare  vult.  Minatur  enim  illis  se  magnas  librorum  farragines  vel  habere  iam  paratas  ad  prosternendam  eorum  doctrinam  vel  adhuc  meditari.  Exclamare  libet.  Quid  dignum  tanto  feret  hic  promissor  hiatu?  Quanquam  fieri  potest,  ut  errem,  et  ipse  aliud  spectet.  Et  profecto  spectat;  venatur  enim  sacerdotium  aliquod,  instar  harae,  in  qua  bene  pinguiter  saginetur.  Sperat  autem  se  talibus  [pag.  92]  promissis  elicere  posse  a  Metensi  episcopo  quod  cupit.  Hoc  enim  hodie  extremum  esse  novit  subsidium  papae  et  eius  praetoriae  cohorti,  canes  passim  alere,  qui  latratu  pios  et  fidos  veritatis  doctores  vexent.  Ego  autem  papistis  vol  talem  causae  suae  patronum  vel  talem  latratorem  non  invideo.  Quid  enim  aliud  proficiet,  quam  ut  papatum  plus  iam  satis  foedum  et  omnibus  flagitiis  con-  22