25:338  quadringentis  abusi  sunt  Dei  ipsius  tolerantia,  quis  interitum  illorum  tam  longae  obstinationis  mercedem  iustam  et  maturam  esse  neget?  Caeterum  illos  excidendo,  rationem  habuit  Deus  electi  populi,  ut  segregatus  a  profanis  hominibus,  nunquam  ad  exteras  corruptelas  deflecteret.  Poenam  vero  quae  nunc  denunciatur,  sua  ignavia  bis  promeriti  sunt  Israelitae,  quia  nec  partibus  suis  defuncti  sunt  in  exigenda  Dei  vindicta,  et  eius  gratiae,  quantum  in  se  erat,  detraxerunt.  Honore  eos  non  vulgari  dignatus  fuerat,  quum  exercendis  suis  iudiciis  ministros  praeficeret.  Turpis  ergo  fuit  segnities,  in  hac  parte  cessare.  Deinde  terram  illis  in  solidum  dederat,  quod  ergo  parte  contenti  neglexerunt  quod  residuum  erat,  in  hoc  torpore  se  prodidit  perversa  ingratitudo.  Adde  quod  ultro  se  implicuerunt  exitialibus  plagis,  gentes  impias  sibi  miscendo,  a  quibus  divinitus  fuerant  separati,  ne  earum  mores  et  perversos  ritus  imitarentur.  Minatur  ergo  Deus,  gentes  illas  tanquam  aculeos  fore  Israelitis,  qui  configant  eorum  oculos,  spinasque  ut  latera  pungant:  quod  fuisse  impletum  liber  Iudicum  maxime  luculentus  est  ac  locuples  testis.  Quanquam  usque  ad  tempus  Davidis  haec  poena  assidue  defixa  fuit  in  eorum  oculis  et  lateribus.  In  quo  etiam  convincitur  indomita  populi  protervia,  apud  quem  nihil  profecit  tam  seria  admonitio,  ut  in  apertis  scelerum  ultionibus  non  minus  quam  in  felici  victoriarum  cursu  pergeret.  NUMER.  CAP.  XXXIV.  1.  Et  loquutus  est  Iehova  ad  Mosen,  dicendo:  2.  Praecipe  filiis  Israel,  et  dicas  eis:  Quum  intraveritis  terram  Chenaan  (ista  est  terra  quae  cadet  vobis  in  haereditatem,  terra  Chenaan  per  terminos  suos),  3.  Erit  vobis  plaga  meridiei  a  deserto  Sin  usque  ad  terminos  Edom:  erit  inquam  vobis  terminus  meridiei  ab  extremo  maris  salis  ad  orientem.  4.  Et  circuibit  vobis  iste  terminus  a  Maale  Acrabim,  et  transibit  usque  ad  Sin:  et  erunt  egressus  eius  a  meridie  in  Cades-Barnea,  atque  illinc  egredietur  ad  villam  Addar,  et  transibit  usque  ad  Asmon.  5.  Praeterea  circuibit  terminus  iste  ab  Asmon  usque  ad  flumen  Aegypti:  et  erunt  illinc  egressus  eius  ad  occidentem.  6.  Terminus  autem  occidentalis  erit  vobis  mare  magnum,  terminus,  inquam,  iste  erit  vobis  terminus  occidentalis.  7.  Iste  vero  erit  vobis  terminus  aquilonaris,  a  mari  magno  describetis  vobis  Hor  montem.  8.  Ab  hoc  monte  describetis  usque  ad  introitum  Hamath  :  et  erunt  egressus  termini  illius  ad  Sedad.  9.  Et  illinc  egredietur  terminus  iste  ad  Ziphon,  eruntque  egressus  eius  ad  villam  Enan:  iste  erit  vobis  terminus  aquilonaris.  10.  Describetis  praeterea  vobis  terminum  ad  orientem,