54:337  337  SUR  LA  SECONDE  A  TIMOTHEE.  338  nous  tendrons  a  Dieu  pleinement:  mais  il  nous  faut  estre  armez  a  perseverance.  Car  si  nous  faisons  seulement  une  belle  levee  de  bouclier,  que  sera-ce?  Et  ainsi  que  nous  poursuivions,  scachans  bien  que  Dieu  ne  nous  a  point  prins  a  son  service  pour  quelque  terme,  mais  que  c'est  a  vie  et  a  mort.  Celuy  donc  qui  ne  s'est  dispose  et  resolu  de  vivre  et  mourir  en  glorificant  son  Dieu,  celuy-la  ne  scait  que  c'est  de  batailler.  Il  faut  donc  en  premier  lieu  faire  nostre  conte,  que  quand  Dieu  nous  appelle,  c'est  afin  que  nous  luy  soyons  sacrifices,  non  seulement  pour  nous  employer,  et  luy  faire  offerte  d'un  iour,  mais  pour  continuer  tout  le  temps  de  nostre  vie:  combien  qu'il  nous  faille  languir,  combien  qu'il  semble  que  nous  devons  perir  en  nos  miseres,  que  nous  persistions  ce  neantmoins.  Et  puis  quand  ce  viendra  a  la  mort,  que  nous  scachions  que  c'est  alors  qu'il  nous  faut  prendre  plus  de  courage,  afin  de  nous  advancer:  comme  les  nautonniers  quand  ils  approchent  du  rivage,  combien  qu'ils  fussent  lassez  auparavant,  si  est-ce  qu'ils  se  resiouissent  au  seul  regard  du  port:  qu'ils  ont  ceste  opinion:  Or  sus,  dedans  deux  ou  trois  heures  nous  avons  a  nous  reposer  tout  a  nostre  aise.  Quand  donc  nous  voyons  que  ces  povres  gens  qui  n'en  peuvent  desia  plus,  qui  sont  tous  rompus  et  cassez,  neantmoins  pour  le  regard  du  port,  prenent  une  telle  vertu  nouvelle:  que  devons-  nous  faire  quand  nous  approchons  de  nostre  but,  et  que  nous  voyons  que  nous  avons  couru,  que  nostre  Dieu  nous  a  tenu  la  main  forte,  et  encores  que  nous  ayons  fait  beaucoup  de  faux  pas,  que  mesmes  nous  soyons  tombez  quelques  fois,  que  nostre  Dieu  nous  a  redressez  et  relevez  devant  que  nous  soyons  parvenus  a  nostre  fin?  Ne  faut-il  pas  que  nous  mettions  peine  de  venir  a  nostre  Dieu,  et  d'en  approcher  tant  plus?  C'est  donc  ce  que  nous  avons  a  retenir  sous  ce  mot,  quand  sainct  Paul  dit  qu'il  a  acheve  sa  course.  Et  mesmes  il  expose  puis  apres,  comment  nous  combatrons  heureusement,  c'est  ascavoir  en  gardant  la  foy.  Il  est  vray  que  ce  mot  de  Foy^  se  peut  prendre  pour  fidelite  :  comme  s'il  disoit  qu'il  a  este  loyal  a  nostre  Seigneur  Iesus  Christ,  et  qu'il  n'a  iamais  fourche,  que  tousiours  il  n'ait  accompli  ce  qui  estoit  de  son  office.  Mais  aussi  nous  pouvons  prendre  ce  mot  de  foy,  en  son  sens  le  plus  commun:  c'est  ascavoir  que  sainct  Paul  ne  s'est  point  destourne  de  la  pure  simplicite  de  l'Evangile,  et  mesmes  qu'il  s'est  appuye  sur  les  promesses  de  salut  qui  luy  estoyent  donnees,  et  qu'ayant  presche  aux  autres,  il  a  monstre  que  c'estoit  a  bon  escient  qu'il  parloit.  Car  de  fait,  toute  la  loyaute  que  Dieu  demande  de  nous  procede  de  la,  c'est  que  nous  soyons  fichez  du  tout  en  sa  parole,  que  nous  y  soyons  tellement  fondez,  que  nous  ne  soyons  point  esmeus  pour  nul  orage  Calvini  opera.  Vol  LIV.