7:336  annos  tres  sancte  iuraret,  te  cum  quibusdam  aliis  tuis  sodalibus  consilium  iniise  de  sacerdote  clam.  necando,  quod  nimis  garrulum  esse  diceretis,  ne  sua  loquacitate  vos  in  periculum  traheret.  Tu  vero,  os  impurum,  nos  facis  Arianos?  in  quibus  nihil  habes  quod  reprehendas,  nisi  quod  divinam  Christi  essentiam  expressius  asserimus  quam  tibi  adlubescat.  Haec  tunc  Calvinus,  ut  audivi.  Nunc  etiam  hic  thraso  haereticos  superciliose  pronunciat,  in  quibus  ne  minima  quidem  suspicio  impietatis,  quam  falso  illis  impingit,  haerere  potest,  et  gloriatur  se  fidei  patronum,  qui  religiones  omnes  pro  fabulis  habeat,  plurisque  abbatis  unius  culinam  quam  aeternum  coeli  domicilium  et  haereditatem  nobis  a  Christo  acquisitam  faciat.  Sic  autem  res  habuit.  Senatus  partibus  auditis  et  causa  rite  discussa,  Farellum,  Calvinum  et  Viretum  puros  et  immunes  ab  haereseos  nota,  quam  illis  Carolus  inurere  conatus  erat,  pronunciavit,  nec  alios  sibi  cognitos  quam  sanae  et  orthodoxae  doctrinae;  Carolum  vero,  tanquam  calumniatorem,  et  propter  alia  flagitia,  [pag.  87]  finibus  suis  iussit  excedere.  Hoc  senatusconsulto  recitato  deiectus  a  pristina  ferocia  et  perculsus  magna  anxietate  agitare  per  quemdam  suum  fautorem  coepit  ut  poena  illa  mitigaretur.  Allatum  est  igitur  ipsum  cum  Farello  et  collegis  reconciliationem  quaerere.  Hic  mihi  dicat,  si  tenebat  eos  Arianismi  convictos,  cur  ministerii  societatem  cum  illis  tantopere  expetebat?  Et  si  verum  est,  quod  nunc  persuadere  vult  Sorbonicis,  corpore  se  tunc,  et  quidem  invitum,  versatum  fuisse  in  castris  nostris,  quis  tunc  eum  morabatur?  Inde  ergo  apparet,  quis  sit  hominis  zelus  et  quae  conscientia.  Nam  si  guttam  unam  sincerae  pietatis  haberet,  moriendum  centies  potius  fuit  quam  ut  cum  manifestis  et  convictis  haereticis  redire  in  gratiam  studeret.  Sed  pergamus.  Ventum  est  in  consistorium,  hoc  est  in  iudicium  ecclesiae.  Illic  suam  tum  nequitiam  iterum  prodidit.  Nam  ut  calumniae  dedecus  elueret,  coepit  de  integro  disputationem  retexere.  Consentiebat  tamen  ad  extremum  cum  illis  per  omnia,  modo  paterentur  huic  sententiae,  Christum  esse  Deum  a  se  ipso,  interpretationem  attexi,  quam  ipse  adferret.  Hoc  vero  indignum  Farello  et  aliis  videri,  quod  plana  et  commoda  interpretatione,  quam  dederant,  non  contentus  plus  aliquid  exigeret.  Animadvertebant  praeterea  hoc  eum  captare  quod  initio  fugerant  ipsum,  nec  sine  causa  initio  movisse  tantas  [pag.  88]  turbas  et  fuisse  in  Farelli  doctrina  aliquid  reprehensione  dignum.  Responsum  est  igitur  eius  esse  accipere  leges,  non  ferre,  qui  bis  iam  ab  ecclesia  et  semel  a  magistratu  damnatus  esset.  Illinc  autem  ad  consulem  profecti  sunt  Farellus,  Calvinus  et  Viretus,  petieruntque  ut  prohiberetur  Carolus  urbe  abire,  donec,  sicuti  pronunciatum  erat  a  senatu,  ita  ipse  quoque  ore  suo  confiteretur,  eos