25:336  sustinuerit.  Tenendum  enim  est  memoria  quod  alibi  docui,  a  transitu  maris  rubri  usque  ad  Mara  nullas  fuisse  aquas  repertas,  quo  magis  detestanda  fuit  populi  impietas,  qui  illic  propter  amarum  aquae  saporem  ad  tumultuandum  prorupit.  Ex  opposito  autem  refulsit  incomparabilis  Dei  misericordia,  quod  homines  morosos  et  importunos  dignatus  est  amoena  et  delectabili  statione  recreare.  Primis  enim  castris  deducti  sunt  in  Elim,  ubi  nacti  sunt  duodecim  fontes,  et  palmas  septuaginta.  Desertum  Sin  leviter  praeterit  Moses,  ac  si  nihil  illic  memoratu  dignum  contigisset:  quum  tamen  illic  se  prodiderit  scelesta  populi  impietas,  et  insigni  miraculo  nobilitatus  fuerit  locus,  quum  man  e  coelo  distillavit  in  alimentum  populi,  ut  apertis  coeli  fenestris,  panem  angelicum  mortalis  homo  comederet.  Breviter  etiam  attingit  in  Raphidim  non  fuisse  aquas  ad  bibendum.  Verum  satis  habuit  hoc  loco  numerare  stationes,  quae  populo  res  gestas  in  memoriam  revocarent.  In  sepulcris  concupiscentiae  insculptum  fuit  vindictae  Dei  monumentum.  Sed  quum  alia  loca  simpliciter  recenset,  sepulta  rerum  narratione,  colligere  licet  quod  paulo  ante  dixi,  non  aliud  fuisse  eius  consilium  quam  populo  ante  oculos  depingere  peregrinationem  qua  defunctus  fuerat  per  annos  quadraginta.  Obiter  tamen  meminit  mortis  Aharon:  quia  singulari  Dei  beneficio  prorogata  fuit  ei  vita  in  gratiam  populi,  donec  instaret  tempus  quo  promissam  terram  adituri  erant,  quandoquidem  utile  ac  necessarium  fraenum  erat  eius  autoritas  ad  cohibendam  gentis  adeo  protervae  ferociam.  Interim  poena  sancto  viro  inflicta  posteros  monere  debuit,  non  abs  re  patres  severe  fuisse  castigatos,  qui  peccata  peccatis  addere  non  destiterant:  quando  ne  servo  quidem  suo  Deus  ob  unicum  delictum  pepercerat.  Quod  continuo  post  addit:  Chananaeum  tunc  primum  audisse  de  adventu  filiorum  Israel,  eo  significat  divinitus  velum  oppositum  fuisse  hostibus,  ne  citius  infesti  essent.  Ita  enim  iudicii  sui  rigorem  mitigavit  Deus  ut  Israelitis  quietum  saltem  esset  exsilium,  et  immune  ab  externa  molestia,  quamdiu  in  deserto  ipsis  errandum  erat.  50.  Loquutus  est  Iehova.  Finem  et  consilium  Dei,  cur  gentes  expelli  vellet,  alibi  exposuimus,  ne  scilicet  adulterarent  suis  mixturis  purum  legis  cultum,  populum  malis  exemplis  corrumperent,  atque  adeo  inquinamenta  essent  terrae  sanctae.  Nunc  vero  alio  respicit  Moses,  quia  de  terrae  partitione  acturus  praefatur,  vacuandam  esse  suis  incolis,  ut  plena  et  libera  fruitio  maneat  filiis  Iisrael.  Contextus  hic  notandus  est:  quoniam  alioqui  locus  hic  appendix  fuisset  primi  praecepti,  sicuti  altera  pars  versus  sub  primo  praecepto  posita  fuit.  Verum  quia  coniunctim  pronunciat  Deus:  Expelletis  incolas  e  terra,  et  illic  habitabitis,  quia  dedi  vobis  possidendam,  absurdum  fuit  membrum  unum  ab  altero  divelli.