47:335  335  IN  EVANGELIUM  IOANNIS  336  intus  spiritu  suo  nos  compellat,  idque  facit  nunc  eodem  momento,  nunc  diversis  temporibus,  prout  illi  visum  est.  Observa  autem  quaenam  sint  illa  omnia,  quorum  doctorem  fore  spiritum  promittit:  Suggeret,  inquit,  vel  reducet  in  memoriam  quaecunque  dixi.  Unde  sequitur  non  fore  novarum  revelationum  architectum.  Hoc  uno  verbo  refutare  licet  quaecunque  sub  praetextu  spiritus  in  ecclesiam  figmenta  ab  initio  hucusque  Satan  invexit.  Mahometes  et  papa  commune  habent  religionis  principium,  non  contineri  in  scriptura  perfectionem  doctrinae,  sed  quiddam  altius  revelatum  esse  a  spiritu.  Ex  eadem  lacuna  nostro  tempore  Anabaptistae  et  Libertini  sua  deliria  hauserunt.  Atqui  impostor  est  spiritus,  non  Christi,  qui  extraneum  aliquod  ab  evangelio  commentum  ingerit.  Spiritum  enim  Christus  promittit,  qui  evangelii  doctrinam  quasi  subscriptor  confirmet.  Quid  sit  mitti  spiritum  a  patre  in  Christi  nomine,  supra  exposui.  27.  Pacem  relinquo  vobis.  Pacis  nomine  intelligit  prosperum  successum,  quem  sibi  mutuo  precari  solent  homines,  dum  simul  conveniunt  vel  alius  ab  alio  digreditur.  Hoc  enim  valet  pacis  nomen  in  lingua  hebraica.  Alludit  ergo  ad  vulgatum  suae  gentis  morem,  ac  si  diceret:  Relinquo  jrobis  meum  Valete.  Sed  mox  subiicit  longe  pluris  esse  hanc  pacem  quam  soleat  esse  inter  homines,  qui  plerumque  frigide  tantum  caeremoniac  causa  pacem  in  ore  habent,  vel  si  pacem  alicui  serio  precantur,  non  tamen  eam  re  ipsa  dare  possunt.  Christus  autem  pacem  suam  non  in  nudo  et  inani  voto  sitam  esse  admonet,  sed  cum  effectu  coniunctam.  Summa  est,  discedere  quidem  ipsum  corpore,  sed  pacem  eius  manere  penes  discipulos:  hoc  est,  fore  eius  benedictione  semper  felices.  Ne  turbetur  cor  vestrum.  Iterum  trepidationem  corrigit,  quam  ex  suo  discessu  conceperant  discipuli.  Causam  trepidandi  esse  negat,  quia  corporali  tantum  eius  adspectu  careant,  vera  autem  eius  praesentia  fruantur  per  spiritum.  Hoc  praesentiae  genere  nos  quoque  contenti  esse  discamus,  nec  carni  indulgeamus,  quae  Deum  semper  externis  suis  figmentis  alligat.  28.  Si  diligeretis  me.  Amabant  haud  dubie  Christum  discipuli,  sed  aliter  quam  decebat.  Fuit  enim  aliquid  carnale  admixtum,  ut  ab  eo  divelli  non  sustinerent.  Quod  si  spiritualiter  eum  amassent,  nihil  magis  illis  fuisset  cordi  quam  eius  ad  patrem  reditus.  Quia  pater  maior  me  est.  Varie  detortus  fuit  hic  locus.  Ariani,  ut  Christum  probarent  quendam  secundarium  esse  Deum,  obiiciebant  minorem  esse  patre.  Patres  orthodoxi,  ut  tali  calumniae  ansam  praeciderent,  dicebant  hoc  debere  ad  naturam  humanam  referri.  Atqui  ut  impie  hoc  testimonio  abusi  sunt  Ariani,  ita  nec  recta,  nec  consentanea  fuit  pa-