41:335  335  SERMON  II.  336  message,  non  point  pour  nous  resiouir,  pour  nous  consoler  ou  instruire,  mais  a  fin  qu'estans  convaincus  de  nos  peches  nous  voions  nostre  condemnation  toute  preste,  et  qu'il  se  declare  iuste  en  ce  qu'il  use  d'une  telle  rigueur  envers  nous,  d'autant  que  nous  n'aurons  point  voulu  recevoir  sa  bonte  et  misericorde.  Et  sainct  Paul  allegue  ce  passage  du  Prophete  Isaye,  nous  monstrant  que  nous  devons  bien  estre  estonnes  si  tost  que  Dieu  parle  a  nous,  a  fin  de  nous  renger  a  luy.  Et  si  nous  ne  le  faisons,  il  faudra  que  nous  reconnoissions  que  Dieu  ne  veut  point  estre  mocque,  que  quand  il  nous  presente  sa  grace,  et  que  nous  refuserons  un  tel  thresor,  et  si  precieux,  que  nous  le  iettons  a  nos  pieds,  ne  faut  il  pas  que  Dieu  se  venge  d'une  telle  ingratitude?  Voila  donc  quant  a  ce  poinct  qui  fut  hier  commance  a  traicter.  Et  au  reste  notons  bien  ce  qui  est  icy  dit  de  la  frayeur  du  Roy  Balsazar,  Que  sa  face  s'est  muee,  que  ses  genoux  heurtojent  l'un  contre  l'autre,  qu'il  n'avoit  membre  qui  ne  fust  desioint,  quelle  est  la  raison  de  tout  cela?  C'est  Dieu  qui  luy  fait  sentir  sa  maieste.  Or  nous  avons  icy  a  observer,  que  Dieu  besongnera  diversement  entre  les  reprouves,  car  quelquesfois  ils  auront  les  aureilles  batues  d'exhortations,  et  de  reprehensions,  et  de  menaces,  et  toutesfois  ils  n'en  seront  point  touches,  comme  nous  voyons  qu'il  y  en  ha  beaucoup  qui  ne  font  que  se  rire  de  tout  ce  qu'on  leur  dira,  la  parole  de  Dieu  n'aura  nulle  autorite  en  eux,  qui  plus  est,  ils  la  voudroient  bien  aneantir  s'il  leur  estoit  possible.  Et  ne  faut  point  aller  plus  loing,  car  si  on  presche  en  cette  ville,  qu'on  sentira  la  vengeance  de  Dieu,  quand  on  ne  voudra  point  recevoir  ce  que  nous  annoncons  au  Nom  de  Dieu,  et  que  cela  ha  este  en  son  Nom  que  nous  avons  parle,  qu'il  y  ha  eu  un  Prophete,  on  se  moquera  de  tout  cela,  Car  allegant  le  passage  d'Ezechiel  ou  il  est  dit,  que  le  peuple  lequel  il  enseignoit  recevoit  bien  la  doctrine  pour  dire,  Ouy  elle  est  bonne,  mais  si  un  homme  venoit  leur  remonstrer:  Comment,  si  quelqu'un  avoit  ioue  de  la  fleute  entre  vous,  vous  diries,  il  ha  bien  chante,  mais  cependant  la  doctrine  ne  vous  convertist  point.  Et  c'est  l'intention  de  Dieu  que  vous  soyes  changes  de  vos  fautes.  Puis  qu'ainsi  est  donc  que  vous  demoures  endurcis  et  que  vous  estes  rebelles  a  la  parole  de  Dieu,  vous  sentires  qu'il  y  ha  un  Prophete  entre  vous.  Or  ce  propos  icy  sera  bien  revele  pour  le  brocarder  aux  tavernes  par  les  meschans  et  reprouves.  O  comment  ils  se  font  prophetes?  Et  vous  le  sentires,  et  ce  sentiment  la  vous  sera  en  tel  estonnement  que  vous  n'aurez  point  le  loisir  de  dire  Helas!  nous  n'avons  point  creu  a  Dieu,  et  n'avons  point  eu  sa  parole  en  telle  reverence  comme  nous  devions,  mais  il  faudra  que  vous  soyes  accables  en  un  moment.