25:335  335  REDITUS  AD  HISTORIAM.  336  Mosis  consilium  oculos  dirigere  convenit,  ut  hoc  caput  cum  fructu  legamus.  Profectiones  autem  vocat  ordines  itinerum,  stationibus  distinctos,  quia  castra  non  movebant  nisi  dato  signo,  quum  scilicet  nubes  relicto  sanctuario,  in  alium  locum  tendebat,  ac  si  Deus  e  coelo  manum  porrigeret  ad  iter  gubernandum:  unde  clarius  innotuit,  eius  potentia  retentos  fuisse  in  deserto.  3.  Profecti  sunt  de  Ramesses.  Quod  volunt  quidam  nomen  urbis  pro  tota  regione  Gossen  positum,  mihi  non  probatur:  quia  consentaneum  non  esset,  ex  locis  distantibus  ac  remotis  simul  fuisse  profectos.  Minus  etiam  quadraret  quod  mox  additur,  turmis  dispositis  egressos  fuisse:  non  quod  in  urbem  omnes  simul  confluxissent,  quia  vix  credibile  est  tantam  multitudinem  potuisse  intra  muros  recipi:  sed  quia  ex  edicto  Mosis  et  Aharon  in  agrum  urbis  aut  viciniam  fuerunt  coacti,  ut  suos  ordines  digererent,  ne  confusa  festinatione  alii  alios  impedirent.  Postquam  autem  dixit  egressos  fuisse  manu  Dei  excelsa,  ut  hanc  admirabilem  potentiam  magis  commendet,  addit  Aegyptios  testes  fuisse  ac  spectatores:  unde  colligitur  cessisse  tandem  Deo,  vel  ita  fuisse  subactos,  ut  digitum  tollere  non  auderent.  Accedit  alia  circumstantia,  quod  tunc  Aegyptii  mortuos  suos  primogenitos  sepelirent:  quibus  verbis  non  significat  Moses  cessasse  ab  impediendo  transitu,  quoniam  alio  negotio  districti  erant:  quin  potius  admonet,  quamvis  eos  exacerbaret  dolor  ex  suorum  morte,  iacuisse  tamen  quasi  exanimes:  quia  eos  debilitaverat  Dei  virtus,  ut  facultas  ad  resistendum  deficeret.  Quod  dicit  Moses  Deum  exercuisse  iudicia  contra  deos  Aegypti,  ad  commendationem  verae  religionis  spectat,  ne  unquam  deflectant  filii  Israel  ad  gentium  superstitiones,  quas  in  sua  liberatione  experti  sunt  meras  esse  fallacias.  Neque  enim  Pharao  duntaxat  prostratus  fuit  cum  suis  copiis,  sed  dii  quoque  eorum  pudefacti,  quos  sibi  fingebant  terrae  suae  praesides.  Atque  ita  refutati,  errorisque  et  stultitiae  convicti  fuerunt  omnes  eorum  cultus.  Frivolum  vero  commentum  est,  sponte  collapsa  fuisse  omnia  idola  in  Aegypto,  ut  Deus  Israel  sibi  uni  deitatis  gloriam  assereret.  Satis  est  Deum  egisse  suos  triumphos  de  idolis,  ubi  re  ipsa  palam  fecit  nullas  illis  ad  opitulandum  vires  suppetere:  et  magorum  simul  praestigias  discussit.  Huc  videtur  alludere  Isaias,  quum  dicit  (19,  1):  Ecce  Deus  in  Aegyptum  veniet,  et  concident  omnia  idola:  significat  enim  Deum  in  Aegypto  editurum  potentiae  suae  documenta,  quae  errorum  omnium  vanitatem  coarguant,  et  evertant  omnia  superstitionum  figmenta,  quibus  decepti  fuerant  Aegyptii.  8.  Profecti  de  Phihahiroth.  Narrat  populum  itinere  tridui  progressum  esse:  non  tam  ad  tolerantiae  laudem  quam  ad  celebrandam  admirabilem  Dei  potentiam,  qui  tantam  multitudinem  absque  aqua