54:334  fueilles,  il  a  bien  combatu,  il  faut  qu'il  soit  couronne.  Et  voici  nostre  Dieu  qui  nous  appelle,  non  point  pour  avoir  quelque  mot  de  louange  en  ceste  vie  presente,  mais  nous  ayans  choisis  a  soy,  il  nous  declare  que  nostre  salaire  est  tout  appreste,  la  couronne  de  gloire  ne  nous  pourra  faillir,  que  nous  scavons  que  tous  les  Anges  de  paradis  nous  applaudissent,  que  nous  serons  finalement  au  dernier  iour,  receus  des  saincts  Patriarches,  des  saincts  Prophetes,  Apostres,  et  Martyrs:  cela  ne  nous  doit-il  pas  donner  courage  de  cheminer  loyaument,  et  combatre  en  bonne  constance  iusques  a  la  fin?  Voila  donc  pourquoy  sainct  Paul  use  ici  de  telles  similitudes,  quand  il  dit  qu'il  a  combatu  un  bon  combat:  comme  s'il  disoit,  Que  ceux  qui  auront  travaille  selon  le  monde  pour  leur  ambition,  ou  pour  leur  avarice,  ou  pour  quelque  .regard,  qu'ils  se  plaisent  et  se  glorifient  tant  qu'ils  voudront  en  leurs  combats:  mais  quant  a  moy  i'ay  bien  dequoy  me  contenter  quand  i'ay  servi  a  mon  Dieu,  que  ie  n'ay  point  perdu  un  pas  qui  ne  soit  venu  en  conte  devant  luy,  que  les  Anges  de  paradis  m'applaudissent  de  ce  que  i'ay  este  un  instrument  pour  executer  au  nom  de  mon  Dieu  ce  qu'il  m'avoit  commis  pour  avancer  le  regne  de  son  Fils:  i'ay  dequoy  m'esiouir  en  cela,  dit-il.  Et  puis  quant  a  la  seconde  comparaison,  notons  bien  que  sainct  Paul  ne  dit  pas  sans  cause  qu'il  a  acheve  sa  course:  car  nous  en  verrons  beaucoup  qui  voudroyent  estre  quittes  quand  ils  auront  fait  quelque  bon  acte:  et  pour  cela  il  leur  semble  que  Dien  leur  devroit  donner  conge,  et  qu'ils  se  pourroyent  reposer  tout  le  temps  de  leur  vie.  Sainct  Paul  monstre  que  ce  n'est  rien  fait,  si  nous  n'avons  persiste  iusques  en  la  fin.  Or  cependant  il  nous  faut  noter  les  circonstances  qui  estoyent  en  la  personne  de  sainct  Paul.  Il  est  en  prison,  ii  attend  la  main  du  bourreau,  et  sa  mort  doit  estre  ignominieuse  quant  au  monde:  les  incredules  avoyent  la  bouche  ouverte  pour  blasphemer,  on  luy  iettoit  sus  tout  opprobre,  les  Iuifs  le  tenoyent  pour  un  apostat,  et  beaucoup  de  faux  chrestiens  l'avoyent  diffame  par  les  Eglises,  tout  le  monde  luy  estoit  ennemi  mortel.  On  pouvoit  donc  iuger  qu'il  avoit  bien  mal  employe  son  temps  d'avoir  ainsi  combatu,  car  il  pouvoit  estre  monsieur  le  docteur  avec  grand'  honneur,  il  pouvoit  estre  assis  au  premier  rang,  iuger  les  autres,  et  avoir  la  vogue  et  renom:  quant  et  quant  il  pouvoit  avoir  bruit  de  sainct  homme  en  Ierusalem,  car  il  n'y  en  avoit  point  qui  le  surmontast  en  toute  honnestete  de  vie:  il  pouvoit  estre  riche  et  bien  venu  par  tout.  Qui  est-ce  qui  n'eust  dit  qu'il  avoit  este  bien  despourveu  de  sens,  et  bien  aveugle,  de  s'aller  exposer  en  toute  ignominie,  de  perdre  toute  estime,  d'esmouvoir  et  enflammer  la  rage  de  tout  le  monde  contre  luy,  tant  de  sa  nation  que  de  tous  peuples,