51:334  nelle  :  car  pour  ceste  cause  s'est-il  fait  homme  mortel  comme  nous,  a  fin  que  la  vie  qu'il  a,  nous  appartienne.  Le  peche  habite-il  encores  en  nous?  Voila  Iesus  Christ  qui  n'a  ne  tache  ni  macule.  Sommes  nous  debiles?  Il  est  la  vertu  de  Dieu  son  Pere:  et  mesmes  ce  qu'il  en  a  receu  en  ceste  humanite  qu'il  a  prinse  de  nous,  a  este  en  nostre  nom  et  pour  nostre  profit.  Bref,  tout  ce  qui  nous  defaut,  et  ce  qui  nous  pourroit  esiouir  et  vivifier,  nous  le  trouverons  en  nostre  Seigneur  Iesus  Christ,  a  fin  de  n'estre  point  en  souci  ni  en  perplexite,  comme  si  nous  estions  exclus  des  biens,  desquels  sainct  Paul  a  fait  mention  ci  dessus.  Bref,  nous  n'aurons  iamais  une  fiance  arrestee,  sinon  que  nous  cognoissions  que  ce  qui  nous  defaut  est  en  nostre  Chef:  car  la  mesure  des  graces  de  Dieu  est  bien  petite,  voire  aux  plus  parfaits,  et  en  ceux  qui  sont  les  plus  avancez,  et  qui  ont  le  mieux  profite.  Puis  qu'ainsi  est  donc,  nous  serions  tousiours  en  branle  et  en  doute.  Mais  quand  nous  cognoissons  que  le  tout  a  esto  accompli  en  nostre  Seigneur  Iesus  Christ,  et  qu'il  est  comme  les  premices,  et  que  nous  luy  avons  este  sanctifiez,  et  qu'en  sa  personne  nous  avons  desia  receu  ce  qu'il  nous  donnera  en  toute  plenitude  apres  nous  avoir  retirez  de  ce  monde:  quand  donc  nous  cognoissons  cela,  voila  ou  gist  nostre  fermete,  et  ou  elle  doit  s'appuyer  pour  n'estre  point  esbranlee  d'aucune  tentation.  Brief,  nous  sommes  enseignez  par  ce  passage,  combien  que  les  graces  de  Dieu  soyent  debiles  en  nous,  c'est  a  dire,  qu'il  y  ait  mis  un  petit  commencement,  et  qu'il  n'y  ait  pas  une  telle  amplitudo  qu'il  seroit  requis  et  a  desirer  :  toutesfois  que  cela  nous  donne  goust  et  saveur  pour  esperer  en  luy:  car  il  n'y  scauroit  avoir  si  peu  de  graces  de  son  S.  Esprit  (comme  S.  Paul  en  parle  au  8.  chap.  des  Rom.)  que  desia  nous  ne  cognoissions  que  c'est  un  gage  et  une  arre  de  la  vie  qu'il  nous  a  promise.  Il  est  vray  qu'il  y  a  encores  ceste  masse  de  peche  qui  y  habite  :  mais  il  nous  doit  suffire  que  Dieu  nous  veut  communiquer  quelque  peu  de  son  S.  Esprit.  Au  reste,  pource  que  nous  ne  pourrions  estre  asseurez  de  tout  cela,  voyant  la  petitesse  qui  est  en  nous,  voyant  nos  infirmitez  et  nos  defauts,  voila  pourquoy  il  nous  faut  eslever  les  yeux  a  Iesus  Christ.  Voire,  mais  de  quoy  nous  profite-il  qu'en  luy  nous  trouvions  toute  perfection?  car  nous  sommes  par  trop  eslongnez  de  luy.  Nous  en  sommes  eslongnez  quant  a  la  distance  des  lieux:  voila  pourquoy  S.  Paul  dit  que  nous  sommes  absens,  d'autant  que  nous  cheminons  par  foy,  et  non  point  par  regard  et  par  veue  apparente.  Mais  quoy  qu'il  en  soit,  si  sommes-nous  membres  de  son  corps.  Puis  qu'ainsi  est  donc  selon  qu'une  racine  ne  se  peut  separer  de  l'arbre,  et  que  elle  envoye  sa  substance  par  toutes  les  branches:  ainsi  cognoissons  que  nostre