5:334  cordis  fiducia,  qua  in  Dei  misericordia,  per  evangelium  nobis  promissa,  secure  acquiescimus.  Sic  enim  a  promissionis  substantia  petenda  est  fidei  definitio:  quae  sic  eo  fundamento  nititur,  ut  sublato  ipso  protinus  corruat,  vel  potius  evanescat.  Proinde  dum  misericordiam  nobis  suam  per  evangelicam  promissionem  defert  Dominus,  si  promittenti  certo  ac  citra  haesitationem  confidimus,  fide  verbum  eius  apprehendere  dicimur.  Neque  ab  hac  definitione  aliena  est  illa  apostoli,  ubi  docet  esse  rerum  sperandarum  subsistentiam,  probationem  non  apparentium  (Hebr.  ll,  ]).  Intelligit  enim  certam  quandam  ac  securam  possessionem  eorum,  quae  a  Deo  promissa  sunt,  et  evidentiam  rerum  non  apparentium:  nempe  vitae  aeternae,  cuius  exspectationem  fiducia  divinae  bonitatis,  per  evangelium  nobis  oblatae,  concipimus.  Quum  autem  omnes  Dei  promissiones  in  Christo  confirmentur  (2  Cor.  1,  17),  et  quodammodo  praestentur  ac  impleantur,  constat  procul  dubio,  Christum  ipsum  perpetuum  fidei  obiectum  esse,  in  quo  universas  divinae  misericordiae  divitias  contempletur.  FIDES  DONUM  DEI.  Si  recte  nobiscum  reputamus,  et  quantum  ad  coelestia  Dei  mysteria  mens  nostra  caecutiat,  et  quanta  diffidentia  cor  nostrum  in  omnibus  laboret,  nihil  dubitabimus,  quin  fides  vim  omnem  naturae  nostrae  longe  superet,  et  Dei  donum  sit  eximium  ac  singulare.  Nam  si  humanae  voluntatis,  ut  Paulus  ratiocinatur,  nemo  est  testis,  nisi  spiritus  hominis  qui  in  ipso  est  (1  Cor.  2,  ll),  divinae  voluntatis  qui  certus  esset  homo?  Et  si  Dei  veritas  apud  nos  in  iis  etiam  rebus  vacillat,  [pag.  19]  quas  oculo  praesenti  intuemur,  qui  firma  stabilisque  foret,  ubi  Dominus  ea  pollicetur,  quae  nec  oculus  videt,  nec  ingenium  hominis  capit?  Itaque  nihil  obscurum  est,  quin  fides  illustratio  sit  sancti  spiritus,  qua  et  mentes  nostrae  illuminantur,  et  confirmantur  corda  in  certam  animi  persuasionem,  quae  statuat  tam  certam  esse  Dei  veritatem,  ut  non  possit  non  praestare,  quod  se  facturum  sancto  suo  verbo  recepit.  Ob  eam  rem  et  arrha  vocatur,  quae  divinae  veritatis  certitudinem  animis  nostris  stabilit:  et  sigillum,  quo  in  diem  Domini  corda  nostra  obsignantur:  quia  ille  est  qui  spiritui  nostro  testificatur,  Deum  esse  nobis  patrem,  nosque  vicissim  eius  filios  (2  Cor.  1,  22;  Eph.  1,  13;  Rom.  8,  16).  IN  CHRISTO  IUSTIFICAMUR  PER  FIDEM.  Postquam  perpetuum  fidei  obiectum  esse  Christum  in  confesso  est,  quid  per  fidem  assequamur,  aliter  scire  non  possumus,  quam  si  in  ipsum  intueamur.  Ipse  autem  ideo  nobis  a  patre  datus,  ut  in