49:334  nobis  discendum  sit  tota  vita,  et  prae  quo  nihil  non  pro  stercore  habendum.  3.  Et  ego  in  infirmitate,  et  in  timore,  et  in  tremore  multa  fui  apud  vos:  4.  et  sermo  meus,  et  praedicatio  mea  non  in  persuasoriis  humanae  sapientiae  sermonibus,  sed  in  demonstratione  spiritus  et  potentiae:  5.  ut  fides  vestra  non  sit  in  sapientia  hominum,  sed  in  potentia  Dei.  3.  Et  ego  in  infirmitate.  Pluribus  exponit  quod  iam.  ante  attigerat,  nihil  se  habuisse  in  hominum  oculis  splendidum  aut  excellens,  quo  magni  fieret.  Sic  autem  concedit  adversariis  quod  quaerebant,  ut  quae  ad  extenuandum  ministerii  illius  honorem  facere  putabant,  in  summam  eius  commendationem  ipse  retorqueat.  Minore  in  pretio  habendus  videbatur,  quod  tam  abiectus  erat  ac  humilis  secundum  carnem:  ostendit,  in  eo  melius  enituisse  Dei  virtutem,  quod  nullis  humanis  adminiculis  suffultus  tantum  potuerit.  Respicit  autem  non  solos  illos  Thrasones,  qui,  ut  acquirerent  sibi  nomen,  ostentationi  modo  studebant:  sed  Corinthios,  qui  obstupescebant  ad  inanes  illorum  pompas.  Itaque  ista  commemoratio  plurimum  habere  debuit  apud  eos  efficaciae.  Sciebant  Paulum  nihil  secundum  carnem  attulisse  quod  eum  promoveret,  vel  quo  se  insinuaret  in  hominum  gratiam:  viderant  tamen  mirabilem  successum,  quem  Dominus  eius  praedicationi  contulerat:  quin  etiam  praesentem  Dei  spiritum  in  eius  doctrina  quodammodo  oculis  perspexerant.  Quum  ergo  neglecta  eius  simplicitate  prurirent  desiderio  nescio  cuius  sapientiae  magis  inflatae  et  politioris,  externoque  colore,  imo  adscititio  fuco  magis  quam  vivo  spiritu  caperentur:  nonne  satis  suam  ambitionem  prodebant?  Merito  igitur  primum  suum  ingressum  reducit  illis  Paulus  in  memoriam,  ne  a  Dei  virtute,  quam  semel  experti  sunt,  deficiant.  I  n  f  i  r  m  i  t  a  t  i  s  nomine  generaliter  complectitur  hic  et  aliquoties  postea,  quidquid  opinione  derogare  alicui  favorem  et  dignitatem  potest.  T  i  m  o  r  et  t  r  e  m  o  r  effecta  sunt  huius  infirmitatis:  quamquam  bifariam  possumus  exponere  haec  duo  nomina:  vel  quod  perpensa  magnitudine  negotii,  quod  sustinebat,  trepidus,  nec  sine  ingenti  sollicitudine  in  eo  versatus  sit  :  vel  quod  multis  periculis  circumseptus,  in  perpetuo  timore  et  anxietate  continua  fuerit.  Utrumque  contextui  non  male  quadrat  :  secundum  tamen  (meo  iudicio)  est  simplicius.  Decet  quidem  haec  modestia  servos  Domini,  ut  propriae  imbecillitatis  conscii,  et  ex  adverso  difficultatem  simul  et  excellentiam  tanti  muneris  suspicientes,  reverentur  et  cum  timore  illud  obeant.  Nam  qui  confidenter  et  praealto  spiritu  se  ingerunt,  vel  qui  secure  tanquam  oneri  pares  verbi  ministerio  funguntur,  neque  se,  neque  rem  ipsam  norunt.  Sed  quum  hic  Paulus  24*