47:334  in  aeterna  eius  veritate  esse  fundatos.  Quantumvis  ergo  cum  sua  protervia  insaniat  mundus,  sequamur  Christi  doctrinam,  quae  supra  coelum  et  terram  longe  eminet.  Quum  sermonem  negat  esse  suum,  accommodat  se  discipulis,  ac  si  diceret,  non  humanum  esse,  quia  fideliter  tradat  quod  illi  a  patre  iniunctum  est.  Interea  scimus,  quatenus  aeterna  est  Dei  sapientia,  ipsum  esse  unicum  omnis  doctrinae  fontem,  et  eius  spiritu  loquutos  esse  quicunque  ab  initio  fuerunt  prophetas.  25.  Haec  loquutus  sum  votis  apud  vos  manens.  26.  Paracletus  autem  spiritus  sanctus,  quem  mittet  pater  in  nomine  meo,  ille  vos  docebit  omnia  et  suggeret  vobis  omnia,  quae  vobis  dixi.  27.  Pacem  relinquo  vobis,  pacem  meam  do  vobis  :  non  quemadmodum  mundus  dat,  ego  do  vobis:  ne  turbetur  cor  vestrum  neque  formidet.  28.  Audistis  quod  dixerim  vobis:  Vado,  et  venio  ad  vos:  si  diligeretis  me,  gauderetis  utique  quod  dixerim:  Vado  ad  patrem,  quia  pater  maior  me  est.  25.  Haec  loquutus  sum.  Hoc  ideo  addit,  ne  despondeant  animum,  etsi  minus  profecerint  quam  par  erat.  Spargebat  enim  tunc  doctrinae  semen,  quod  aliquamdiu  suffocatum  latuit  in  discipulis.  Ergo  eos  ad  bene  sperandum  hortatur,  donec  fructum  proferat  doctrina,  quae  nunc  videri  posset  inutilis.  In  summa  testatur  illis  in  doctrina,  quam  audierant,  suppetere  uberem  consolationis  materiam,  nec  alibi  quaerendam  esse.  Quod  si  non  illis  statim  appareat,  iubet  esse  bono  animo,  donec  spiritus  interior  magister  idem  in  ipsorum  cordibus  loquatur.  Valde  utilis  omnibus  admonitio,  nisi  statim  consequimur  quidquid  docet  Christus,  obrepit  fastidium  et  irritum  in  rebus  obscuris  laborem  insumere  nos  piget.  Atqui  afferenda  est  prompta  docilitas,  praebendae  aures  et  retinenda  attentio,  si  rite  in  Dei  schola  proficere  cupimus:  praesertim  vero  tolerantia  opus  eat,  donec  patefaciat  spiritus  quod  frustra  visi  sumus  saepius  legisse  vel  audisse.  Quare  ne  languescat  in  nobis  discendi  studium  vel  in  desperationem  labamur,  ubi  non  statim  assequimur  loquentis  Christi  mentem,  sciamus  hoc  nobis  omnibus  dici,  spiritus  tandem  suggeret  quae  loquutus  sum.  Hanc  quidem  poenam  denuntiat  incredulis  Iesaias  (29,  l  l  )  ,  ut  sermo  Dei  sit  illis  tanquam  liber  clausus.  Sed  Dominus  hoc  etiam  modo  plerumque  suos  humiliat.  Ideo  patienter  ac  placide  exspectandum  revelationis  tempus,  nec  verbum  propterea  respuere  decet.  Caeterum  quum  testetur  Christus,  proprium  esse  spiritus  sancti  munus  docere  apostolos,  quod  iam  ex  ipsius  ore  didicerant,  sequitur  irritam  et  nihili  fore  externam  praedicationem,  nisi  accedat  spiritus  magisterium.  Duplicem  ergo  habet  Deus  docendi  modum.  Nam  et  hominum  ore  insonat  nostris  auribus  et