1:334  illae  bene  sibi  esse  cupiunt,  et  ubi  species  boni,  quae  sensum  moveat,  apparet,  eo  sequuntur.  Homo  vero  nec  id  quod  vere  sibi  bonum  sit,  pro  naturae  suae  immortalis  excellentia,  ratione  deligit,  ut  id  studio  persequatur;  nec  rationem  adhibet  in  consilium,  nec  mentem  intendit;  sed  sine  ratione,  sine  consilio,  naturae  inclinationem  instar  pecudis  sequitur.  Nihil  ergo  hoc  ad  arbitrii  libertatem,  an  homo  sensu  naturae  ad  bonum  appetendum  feratur;  sed  hoc  requiritur,  ut  bonum  recta  ratione  diiudicet,  cognitum  eligat,  electum  persequatur.  Ac  ne  cui  scrupulus  inhaereat,  advertendus  est  duplex  paralogismus.  Nam  et  appetitus  hic  non  proprius  voluntatis  motus,  1)  sed  naturalis  inclinatio,  et  bonum,  non  virtutis  aut  iustitiae  appellatur,  sed  conditionis:  ut  scilicet  homo  bene  habeat.  Quando  igitur  nihil  ad  probandam  arbitrii  libertatem  facit  naturale  hominibus  bene  habendi  desiderium,  non  magis  scilicet  quam  in  metallis  et  lapidibus,  ad  essentiae  suae  perfectionem  inclinans  affectio,  in  aliis  consideremus,  sitne  penitus  ita  omni  ex  parte  vitiata  corruptaque  voluntas,  ut  nihil  nisi  malum  generet;  an  particulam  aliquam  illaesam  retineat,  unde  nascantur  bona  desideria.  46.  Qui  primae  Dei  gratiae  tribuunt  ut  efficaciter  velimus,  e  converso  innuere  videntur,  inesse  facultatem  animae,  ultro  ad  bonum  aspirandi;  sed  imbecilliorem,  quam  quae  in  solidum  affectum  emergere,  aut  conatum  excitare  possit.  Nec  dubium  quin  hanc  opinionem,  ab  Origene  et  veterum  quibusdam  sumptam,  scholastici  communiter  amplexi  sint;  quando  solent  hominem  in  puris,  ut  loquuntur,  naturalibus  reputare.  Qualem  describit  apostolus  his  verbis  (Rom.  7,  15  et  19):  non  quod  volo  bonum,  hoc  facio;  sed  quod  nolo  malum,  hoc  ago;  velle  adiacet  mihi,  perficere  autem  non  invenio.  Sed  perperam  hoc  modo  invertitur  tota,  quam  illic  exsequitur  Paulus,  disputatio.  Tractat  enim  de  lucta  christiana,  quam  brevius  attingit  ad  Galatas  (5,  17);  quam  fideles  in  conflictu  carnis  et  spiritus  in  se  perpetuo  sentiunt.  Porro  spiritus  non  a  natura  est,  sed  a  regeneratione.  Loqui  autem  apostolum  de  regeneratis  inde  constat,  quod  ubi  dixerat  in  se  bonum  nullum  habitare,  subnectit  expositionem,  quod  intelligat  de  carne  sua.  Ideoque  negat  se  esse  qui  malum  faciat,  sed  peccatum  in  se  inhabitans.  Quid  sibi  vult  illud:  in  me,  ioe  est  in  carne  mea?  Nempe  ac  si  in  hunc  modum  loqueretur:  non  habitat  in  me  bonum  a  me  ipso;  nam  in  carne  mea  nihil  boni  reperire  est.  Hinc  sequitur  illa  species  excusationis:  non  facio  malum  ipse,  sed  quod  habitat  in  me  peccatum;  quae  solis  regeneratis  competit,  qui  praecipua  animae  parte  ad  bonum  tendunt.  Iam  vero  quae  subiicitur  conclusio  totum  hoc  liquido  declarat.  Condelector,  inquit,  legi  Dei2)  secundum  1)  modus  1550  seqq.  2)  omitt.  Dei  1550  et  seqq