32:333  333  PSALMUS  CXXX.  334  simul  ac  oculis  nostris  spes  aliqua  proventus  occurrit,  rogandum  esse  Deum,  in  cuius  manu  est  terrae  foecunditas,  ut  benedictionem  suam  pleno  effectu  confirmet.  Et  certe  quum  tot  periculis  obnoxii  sint  terrae  fructus,  mirum  nisi  necessitas  ipsa  nos  ad  orandum  sollicitet.  Adde  quod  non  de  solis  filiis  Dei  loquitur,  qui  vere  ex  eius  verbo  edocti  sunt  terram  eius  gratia  esse  fertilem  :  sed  complectitur  etiam  homines  profanos,  quibus  naturaliter  ingenita  est  eadem  notitia.  Porro  si  non  modo  habitabimus  in  ecclesia  Domini,  sed  studebimus  censeri  inter  legitimos  eius  cives,  intrepide  despicere  licebit  totam  hostium  nostrorum  potentiam,  quia  etsi  floreant  ad  tempus,  sintque  conspicui,  sunt  tamen  herbae  steriles  et  maledictae.  PSALMUS  CXXX.  ARG.  Sive  privatim  suo  nomine  oret  propheta,  sive  ecclesiae  totius  personam  sustineat,  malis  obrutus  ardenti  vehementia  liberationem  flagitat.  Et  quanquam  se  iuste  castigari  agnoscit  Dei  manu,  se  tamen  et  pios  omnes  ad  bene  sperandum  hortatur,  quia  Deus  suorum  sit  perpetuus  redemptor,  et  in  promptu  suppetat  ratio  qua  eos  a  morte  eripiat.  Canticum  graduum.  1.  De  profundis  clamavi  ad  te  Iehova  :  2.  Domine  audi  vocem  meam,  intentae  sint  aures  tuae  ad  vocem  precationum  mearum.  3.  Si  iniquitates  observes  Deus,  Domine  quis  consistet?  4.  Quia  apud  te  est  propitiatio  ut  timearis.  1.  (De  profundis.)  Notandum  est  quod  se  velut  ex  profundo  gurgite  vocem  emittere  dicit  propheta,  utpote  malis  obrutus.  Quia  enim  miseriae  quarum  finis  non  apparet,  desperationem  fere  secum  trahunt,  nihil  magis  difficile  quam  ex  gravi  et  alta  moestitia  animos  excitare  ad  precandum.  Et  mirum  est,  quum  rebus  laetis  et  tranquillis  frigeant  preces,  quia  tunc  sensus  nostros  occupat  securitas:  malis  quae  acuere  nos  debebant,  magis  torpere  attonitos.  Atqui  propheta  ex  molestiis,  cura,  periculis,  moerore,  sub  quibus  demersus  est,  precandi  fiduciam  sumit.  Anxietatem  vero  et  studii  ardorem  exprimit  tam  voce  clamoris,  quam  repetitione  quae  habetur  secundo  versu.  Quo  magis  detestabilis  est  barbara  papistarum  inscitia,  dum  Psalmum  hunc  in  usum  alienum  trahentes,  foede  profanant.  Quorsum  enim  demurmurant  eum  pro  mortuis,  nisi  quod  eos  fascinavit  Satan  ut  doctrinam  apprime  utilem  suo  sacrilegio  exstinguerent?  Nam  ex  quo  ad  mortuas  umbras  raptus  fuit  Psalmus,  vulgo  fere  creditum  est  nullum  esse  eius  usum  inter  vivos  :  atque  ita  mundo  periit  incomparabilis  thesaurus.