51:332  telle,  comme  nous  l'avons  desia  ouye,  en  son  Fils  unique,  que  seroit-ce?  Car  nous  pourrions  alleguer  pour  replique,  Et  comment?  Ou  sont  ces  richesses  de  Dieu  ?  Car  non  seulement  nous  sommes  desnuez  des  biens  de  ce  monde,  mais  nous  sommes  comme  une  terre  seche  et  sterile,  quant  aux  graces  du  S.  Esprit:  s'il  y  en  a  quelque  portion  en  nous,  elle  est  tant  petite  que  nous  en  devons  avoir  honte:  et  cependant  nous  sommes  plongez  en  nos  infirmitez.  Si  on  nous  parle  de  la  vertu  de  Dieu,  elle  doit  estre  victorieuse  en  nous  par  dessus  le  peche.  Or  nous  sommes  tant  debiles,  que  nous  voila  comme  abatus.  Apres,  il  faudroit  que  l'image  de  Dieu  reluist  en  nous:  et  nous  portons  tant  de  souilleures  et  tant  de  taches  que  c'est  pitie.  Nous  devrions  estre  du  tout  consacrez  a  Dieu:  or  le  monde  nous  retient,  et  y  sommes  comme  enveloppez.  Voila  comme  les  fideles  se  pourroyent  trouver  esbahis  quand  on  leur  parleroit  des  graces  de  Dieu,  et  qu'ils  seroyent  la  arrestez,  d'autant  qu'on  ne  les  ameneroit  point  iusques  a  Iesus  Christ.  S.  Paul  donc  non  sans  cause  adiouste  ici  que  Dieu  a  desploye  l'exellence  de  sa  vertu,  quand  il  a  ressuscite  des  morts  nostre  Seigneur  Iesus.  Or  il  parle  notamment  de  la  resurrection,  pource  qu'en  sa  mort  nous  ne  voyons  la  rien  encores  qui  ne  fust  pour  nous  estonner.  Car  il  n'y  apparoist  qu'infirmite:  mais  il  s'est  declaire  Fils  de  Dieu,  quand  il  a  vaincu  la  mort.  Il  s'est  aussi  monstre  le  Seigneur  de  gloire  et  de  vie,  ayant  tout  empire  en  soy.  Et  c'est  aussi  pourquoy  sainct  Paul  met  que  Dieu  l'a  assis  a  sa  dextre  :  car  ce  ne  seroit  point  assez  que  Iesus  Christ  fust  ressuscite,  sinon  qu'il  eust  un  empire  continuel  et  permanent.  Il  est  vray  que  desia  en  sa  resurrection  nous  avons  tesmoignage  qu'il  est  Fils  de  Dieu:  mais  quoy  qu'il  en  soit,  si  faut-il  passer  un  degre  plus  outre,  c'est  qu'il  n'y  a  point  eu  une  bouffee  de  vertu  :  mais  quand  il  esfc  ressuscite,  il  a  acquis  telle  superiorite  que  tout  le  monde  est  gouverne  par  luy,  et  que  maintenant  il  est  assis  a  la  dextre  de  Dieu  son  Pere,  a  fin  de  soustenir  et  conserver  les  siens  qui  l'invoquent  et  se  remettent  en  sa  garde:  qu'il  a  une  vertu  suffisante  pour  surmonter  Satan  et  tout  le  monde,  et  tous  nos  ennemis.  Nous  voyons  donc  maintenant  l'intention  de  sainct  Paul  :  d'autant  que  nous  pourrions  estre  abatus,  et  que  nostre  foy  pour  le  moins  seroit  fort  esbranlee,  si  nous  n'avions  esgard  qu'a  nous,  voila  pourquoy  il  nous  propose  Iesus  Christ,  comme  le  vray  patron  auquel  nous  pouvons  voir  ce  qui  est  encores  cache  en  nous,  c'est  a  scavoir,  la  vertu  inestimable  de  Dieu  qui  surmonte  tout  le  monde.  Car  en  premier  lieu,  il  est  ressuscite  des  morts:  et  puis  il  est  assis  a  la  dextre  de  son  Pere.  Or  c'est  une  similitude  prinse  des  hommes,  quand  il