50:332  Paul  a  este  faict  un  homme  nouveau.  Et  c'est  pourquoy  notamment  il  dit  qu'il  persecutoit  l'Eglise  de  Dieu,  qu'il  destruisoit  tout,  qu'il  a  este  comme  un  brigand  (par  maniere  de  dire)  iusques  a  ce  que  Dieu  l'a  change,  et  au  lieu  d'un  loup  ravissant,  qu'il  l'a  rendu  brebis  en  la  fin,  qu'il  l'a  constitue  Pasteur  en  son  Eglise  sous  nostre  Seigneur  Iesus  Christ.  Voila  donc  comme  nous  appercevons  que  sainct  Paul  nous  a  este  envoye  de  la  main  de  Dieu,  et  qu'il  porte  une  marque  asseuree,  tellement  que  nous  voyons  qu'il  ne  s'est  point  ingere:  mais  que  c'a  este  un  ouvrage  du  sainct  Esprit,  et  qu'il  n'y  a  rien  de  son  propre  en  la  doctrine  qu'il  a  annoncee,  d'autant  qu'il  a  falu  qu'il  ait  renonce  pleinement  a  soy,  a  fin  de  s'adonner  et  s'appliquer  au  service  de  nostre  Seigneur  Iesus  Christ.  Car  si  sainct  Paul  eust  este  mene  d'ambition,  nous  scavons  qu'il  estoit  honore  entre  les  siens,  et  qu'il  pouvoit  la  se  faire  valoir.  S'il  estoit  aussi  question  d'estre  repute  homme  de  saincte  vie,  il  estoit  irreprehensible.  D'autre  coste,  il  estoit  a  son  aise,  et  vivoit  en  repos.  Or  il  a  falu  qu'il  ait  estime  comme  fiente  et  ordure  (ainsi  qu'il  le  proteste  aux  Philip.)  tout  ce  qui  estoit  desirable  selon  le  monde,  et  qu'il  avoit  prise  auparavant,  qu'il  ait  reiette  tout  cela  comme  chose  nuisible,  voyant  bien  que  ce  luy  estoit  autant  d'empeschement  d'approcher  de  nostre  Seigneur  Iesus  Christ.  Non  seulement  donc  S.  Paul  a  quitte  ceste  reputation  qu'il  avoit  d'estre  un  grand  docteur,  et  puis  apres  d'estre  un  sainct  personnage,  et  comme  un  petit  Ange:  qu'il  a  aussi  quitte  tout  le  repos,  les  aises  et  commoditez  de  ce  monde:  mais  devant  Dieu  il  a  renonce  a  ce  qu'il  pensoit  acquerir  la  vie  eternelle  par  ses  bonnes  oeuvres,,  il  a  reiette  tout  cela  comme  abomination,  scachant  bien  qu'il  estoit  aveugle  d'orgueil,  d'autant  qu'il  cuidoit  valoir  quelque  chose  devant  Dieu,  et  acquerir  quelque  grace  par  ce  moyen.  Il  a  falu  (di-ie)  que  non  seulement  il  ait  mis  tout  cela  sous  le  pied  :  mais  qu'il  Tait  eu  en  detestation,  comme  il  le  proteste.  Quand  donc  nous  voyons  cela,  tant  mieux  sommes  nous  confermez  en  ce  qu'il  dit,  qu'exercant  ceste  charge  d'Apostre  il  n'a  rien  eu  de  l'homme,  ni  mesmes  de  soy,  d'autant  qu'il  s'estoit  desnue  de  ce  qu'auparavant  il  avoit  beaucoup  prise.  Car  en  ce  qu'il  confesse  d'avoir  este  persecuteur  de  l'Eglise  de  Dieu,  nous  voyons  comme  il  ne  s'espargne  nullement,  a  fin  de  tousiours  maintenir  l'honneur  de  Dieu,  et  l'authorite  et  maistrise  de  nostre  Seigneur  Iesus  Christ  auquel  il  servoit.  Or  voila  aussi  comme  il  nous  y  faut  proceder:  si  nous  desirons  de  nous  employer  au  service  de  Dieu,  il  faut  bien  oublier  nos  personnes,  et  ne  point  estre  delicats  pour  cercher  ce  qui  nous  est  propre  pour  nostre  profit,  ni  pour  nostre  honneur.  Iusques  a  tant  donc  que  nous  soyons  la  venus  de  nous