32:332  det  relaxationem  miseris:  sicut  Paulus  hanc  rationem  adducit  in  secunda  sua  epistola  ad  Thessalonicenses,  cap.  1,  7.  Atque  hoc  notatu  apprime  dignum  est,  salutem  ecclesiae  necessario  coniunctam  esse  cum  Dei  iustitia.  Prudenter  etiam  propheta  admonet,  ideo  non  praevaluisse  hostes,  quia  Deus  eorum  conatus  abrupit,  nec  passus  est  ultra  progredi  quam  apud  se  decreverat.  5.  Pudefient,  et  vertentur  retrorsum  omnes  qui  oderunt  Sion.  6.  Erunt  sicut  herba  tectorum,  quae  antequam  exeat  arescit:  7.  De  qua  non  implevit  manum  suam  messor,  neque  sinum  suum  manipulos  colligens.  8.  Neque  dixerunt  transeuntes,  Benedictio  Iehovae  super  vos,  benedicimus  vobis  in  nomine  Iehovae.  5.  (Pudefient.)  Sive  haec  precatio  sit,  sive  promissio,  in  futurum  tempus  respicit  propheta.  Et  certe  quum  verba  omnia  sint  futuri  temporis,  aptissime  convenit  sensus  si  ex  praeteritis  colligat  quid  in  finem  usque  sperandum  sit.  Utrovis  modo  accipias,  docet  propheta  non  esse  cur  animum  despondeant  fideles,  ubi  vident  in  sublime  hostes  suos  attolli.  Neque  enim  propter  altiorem  situm  pluris  est  herba  quae  in  tectis  nascitur,  quam  seges  quae  in  humili  fundo  calcatur  pedibus.  Nam  herbae  tectorum  licet  alte  emineant  super  hominum  capita,  primum  sunt  inutiles,  deinde  paulo  post  arescunt.  Alii  verbum  tpty  vertunt  evellatur:  ac  si  dictum  esset,  absque  manu  vel  artificio  hominis  siccari.  Sed  quum  proprie  educi  vel  exire  significet,  intelligit  (meo  iudicio)  propheta,  adeo  non  esse  diuturnum  vigorem,  ut  marcescant  ac  pereant  in  primo  germine:  quia  nulla  subest  radix,  nulla  etiam  terra  quae  succum  vel  humorem  suppeditet  in  alimentum.  Quoties  ergo  nos  terrebit  hostium  splendor,  vel  eminentia,  veniat  nobis  in  memoriam  haec  comparatio,  herbam  in  tectis  nascentem  esse  sublimem,  sed  absque  radice,  ideoque  non  longae  durationis:  sic  istos,  quo  propius  superbiae  suae  altitudine  ad  solem  accedunt,  citius  aestu  consumptum  iri,  quia  radice  carent:  quum  sola  humilitas  vitam  et  vigorem  a  Deo  hauriat  ut  nobis  inspiret.  7.  (De  qua  non  implevit.)  Confirmat  rursus,  quantumvis  exsurgant  impii,  vel  se  efferant,  manere  tamen  in  herba,  quia  neque  unquam  producunt  bonam  frugem,  neque  ad  maturitatem  perveniunt,  sed  mera  apparentia  (ut  loquuntur)  turgent.  Ut  hoc  planum  faciat,  opponit  eos  herbis  frugiferis,  quae  ex  vallibus  et  locis  depressis  alimenta  hominibus  producunt.  Tandem  omnium  odio  vel  contemptu  dignos  esse  dicit,  quum  publicis  votis  benedicantur  segetes.  Caeterum,  quum  doctrinam  hanc  a  communi  vitae  usu  sumpserit  propheta,  monemur,