54:330  une  oblation  sacree,  que  nous  soyons  prests  de  luy  rendre  obeissance  en  tout  et  par  tout.  Et  c'est  aussi  suyvant  ce  qui  est  est  dit  au  quatorzieme  des  Romains,  que  nous  vivions  et  mourions  avec  luy,  c'est  a  dire,  que  nous  ne  soyons  point  addonnez  a  nous-mesmes  pour  vivre  a  nostre  phantasie  ou  appetit,  que  nous  ne  vueillions  point  aussi  avancer  nostre  mort,  ni  l'abbreger,  mais  que  nous  remettions  tout  cela  en  la  main  de  nostre  Dieu,  que  nous  vivions  en  mourant,  pour  captiver  tous  nos  sens,  toutes  nos  affections  charnelles,  et  que  nous  mourions  en  vivant,  estans  prests  et  appareillez  de  partir  quand  Dieu  nous  appellera.  Et  cependant  que  nous  apprenions  (comme  i'ay  dit)  de  nous  remettre  entre  ses  mains,  tellement  que  nous  puissions  protester  avec  David,  Que  si  nostre  esprit  est  en  sa  main,  qu'il  sera  en  bonne  et  seure  garde.  Et  pourtant  que  nous  luy  commettions,  et  l'en  faisons  du  tout  maistre,  afin  qu'il  ne  luy  puisse  point  estre  oste.  Or  pour  nous  confermer  en  ceste-doctrine-la,  il  nous  faut  noter  ce  mot  que  sainct  Paul  adiouste,  Le  temps  de  ma  resolution  (dit-il)  est  prochain.  II  veut  ici  signifier  un  departement  quant  a  ces  choses  terrestres.  Car  comment  est-ce  que  nous  sommes  separez  en  la  mort?  Il  est  vray  que  nous  serons  bien  retirez  de  la  compagnie  des  vivans;  mais  chacun  de  nous  souffre  une  separation  en  soy,  entant  que  l'ame  est  departie  d'avec  le  corps.  Et  par  la  nous  voyons  que  l'homme  fidele  n'est  point  aneanti  en  la  mort,  mais  seulement  qu'il  se  fait  une  separation.  Combien  donc  que  le  corps  s'en  aille  pourrir  en  terre,  et  qu'il  semble  estre  comme  aneanti,  toutesfois  l'ame  demeure  en  son  entier:  d'autant  qu'elle  est  creee  a  l'image  de  Dieu,  il  faut  qu'elle  garde  son  immortalite.  Puis  qu'ainsi  est,  nous  ne  devons  point  estre  tant  faschez  et  troublez  en  la  mort,  comme  on  a  accoustume  d'estre.  Qui  est  cause  que  la  mort  nous  espovante  ainsi?  C'est  nostre  infidelite,  qu'il  nous  semble  que  tout  est  mort  pour  nous,  et  beaucoup  se  nourrissent  en  cela,  qu'ils  s'estiment  autant  que  des  bestes  brutes.  Il  est  vray  que  nous  aurons  bien  nostre  vie  commune  avec  les  bestes  brutes:  mais  cependant  nous  avons  les  marques  de  la  vie  immortelle,  quand  Dieu  nous  a  donne  sens  et  raison,  qu'il  nous  a  donne  cognoissance,  pour  dire  qu'il  est  nostre  Createur.  Combien  que  nous  soyons  embrouillez  en  tant  d'ignorances  et  d'erreurs  que  rien  plus,  toutesfois  il  nous  demeure  tousiours  quelque  residu  pour  nous  faire  sentir  que  nous  avons  este  creez,  non  point  pour  ceste  vie  presente  et  transitoire,  mais  que  Dieu  nous  appelle  plus  haut.  Et  pource  que  nous  ne  cognoissons  point  assez  que  Dieu  nous  appelle  a  ceste  condition,  voila  qui  est  cause  que  nous  fuyons  la  mort  tant  qu'il  nous  est  possible,  et  quand  on